ما هو المنطق يا مرسي ؟؟
اشهر افييه فى مسرحيه مدرسه المشاغبين .. يليه افييه مرسي الزناتى اتهزم يا رجاله
بس تفتكروا مرسي اتهزم عشان معرفش المنطق ... ولا لو كان موجود الايام دى و حاول يمنطق الحياه
كان هيتهزم هزيمه اكبر من اللى اتهزمها .. و كان هيقول الحمد لله على نعمه الجهل
اصل صعب اوى تحاول تفهم الدنيا ماشيه ازاى .. او تفهم المنطق اللى ماشيه بيه
حاجات كتيييير اوى ملهاش ادنى علاقه بعم المنطق ده
ولو حاولت طول حياتك انك تمنطقها برده هتفشل
زى المشاعر مثلا ... لا بتعرف انت حبيت ده ليه .. ولا كرهت ده ليه ..
ولا تقدر تتحكم فى مشاعرك ... و تقول لها حبى ده و اكرهى ده ...
ولا برده بتفهم الناس ليه حبتك وليه كرهتك و ليه بتتحول ...
سيبك من ده كله ... حتى لو معرفتش الاسباب ... برده مفيش منطق بيحكم العلاقه
بمعنى انك متقدرش تقول لو فلان حبنى مكانش عمل كذا
ولو علان كان بيكرهنى مكانش عمل كذا
ممكن تعشق حد و تؤذيه ... و ممكن تكرهه و تقف جنبه ...
عشان المشاعر لا تمنطق ...
مكتوب فى كل الكتب برده ان كل الاهل بيحبوا ولادهم ...
بس افتح اى صفحه حوادث فى اى جرنان .. هتلاقى اهالى بيدمروا ولادهم مش بس بيأذوهم
بس الناس بتتصرف بطريقه غريبه ... ممكن تبقي عايز الحاجه
وتتصرف عكس ما انت عايز .. لمجرد عند .. و تنتهى بتدمير حاجات كتير
عشان فى حاجات العقل بيقف قدامها عاجز ... و التصرف بيسبق التفكير
ممكن اتنين يحبوا بعض اوى ... و يتصرفوا مع بعض بمنتهى الغباء ... و يضيعوا بمنتهى الغباء برده كل فرصهم
وكل ما واحد يقرب التانى يبعد
ممكن تبقي عارف انك ماشي فى طريق سد ... تمشي فى طريق عارف ان فيه نهايتك
عارف و شايف و فاهم .. مش مغيب ولا حد ضاحك عليك و مشربك حاجه اصفرا
بس بتمشي و تكمل للاخر ... و انت عارف ان كل خطوه بتمشيها .. كل الطرق اللى وراك بتتقطع
وبيبقي مستحيل الرجوع ... و الطريق قدامك مسدود .. و برده بتاخد خطوات لقدام و بتكمل
وتتعب و تنهار و برده مش قادر تمنع نفسك
ممكن حاجات كتير اوى بس ببساطه لو فكرت تدور على منطق و اسباب مقنعه ليه الناس بتتصرف زى ما بتتصرف
ليه الدنيا بيحصل فيها اللى بيحصل
هتلاقى نفسك فى متاهه ... تايه بتدور على كل الابواب .. بتفكر فى السبب و نقيضه ... بتدور على كل تفسير ممكن
و تشك فى كل اللى تعرفه ... و تكفر بكل البديهيات فى الموضوع و تشك فى كل حاجه
وتتوه اكتر ما انت تايه
يعنى فعلا مرسي لو كان عرف المنطق و حاول يطبقه على الحياه ... كانت اتهزم يا مينززززز اكتر من هزيمته الاولى
4 comments:
ما هو ده كله جميل لو الحياة ماشية بالمنطق
لكن اراهنك لو صبرتي و اتحملتي تمنطقي حاجة حصلت لك هتلاقي ان الناس بيتصرفوا اصلا بدون منطق..يعني بيتصرفوا في حياتهم و علاقاتهم الاجتماعية بالبركة
مش ماشيين علي اساس معين
طبعآ مش كل الناس..بس الاغلبية كده
احنا مجتمع لا منطقي
و البحث عن المنطق فيه تصرف لا منطقي
حاولي تمشي عكس المنطق هتفهمي كل حاجة بتدور حواليكي
انا بطلت امنطقها واحسبها وافلسف كل حاجه
لو فضلت اعمل ده هاتعقد اكتر منا معقده
سلتو : الحياه فعلا ماشيه من غير اى منطق
مش عارفه امشى عكس المنطق ... عشان كده مش قادره افهم اى حاجه بتدور حواليا
و عماله الف حوالين نفسي فى دايره مفرغه
هيبقي فيها نهايتى ان شاء الله
بس انت قول يا رب
نورهانتى : تقصدى ايه بنت
شامه ريحه تلميحات:D
والله خير ما عملتى .. عقبالى يا رب
Post a Comment