Sunday, November 2, 2008

كلام على السريع

من باب محاوله انى ادوس و اعمل حاجات جديده
سمعت كلام سلتو و دخلت معاه الراديو
كانت تجربه مزعجه ... لكم الدوشه اللى كانت فى ودانى
جابت لى صداع نصفى ... ده غير انى اتاكدت انى فاشله جدا فى موضوع الاذاعه
لانى مليش فى موضوع الكلام و دور المذيع ده ابزليوتلى
رغم محاولات انغام و سلطان باقناعى انى انفع




اخيرا سمعت خبر حلو
اول قصه حب شفتها فى حياتى
بنت كانت معايا فى المدرسه من اعدادى
كلمتها امبارح ... قالتلى اتخطبت
سالتها .. محمد ... قالتلى ايوه
صفاء و محمد اتخطبوا ... و بيحضروا الشقه و هيتجوزوا السنه الجايه
فرحت جدا بالخبر ده ...
عقبال العايزين


و من تكمله الشجاعه اللى انا بقيت فيها
عملت حركه جريئه و نزلت سقت العربيه .. و قررت اروح بيها الجامعه
طبعا مش لوحدى .. اخويا كان جنبي ... و كل شويه يلحقنى فى اخر لحظه
ويعدل هو العربيه .. بعد ما اكون انا طالعه على الرصيف خلاص
او اكون برمى على الناس ... بس المغامره انتهت فى شارع مجرى العيون
بعربيه جايبه من U turn
وانا كاى واحده شجاعه ... لقيت العربيه فجاه فى وشي جايه عكسي ..
ضربت فرامل ... و سيبت الدركسيون و حطيت ايدى على بقي و انا بصرخ
طبعا نزلت واخويا خد منى العربيه
و هفكر مليون مره قبل ما اسوق تانى .. بسبب شجاعتى الفظيعه


مازالت حالتى الصحيه سيئه
وبعد ما الدكتور زهق .. قرر يبعتنى نفسيه
وانا كنت سعيده بالقرار ده لانى فى اشد الحاجه للعلاج النفسي
ولان اى موقف فيه توتر اعصاب بقى بيتعبنى
عرفت دلوقتى معنى طاسه الخضه :D
اهو دى انا محتاجاها ... مجرد قطه معديه من جنبي
عندها القدره انى اترعش و اعصابى تسيب
سواقه عربيه .. محاوله انتحار ... و اذاعه فى الراديو تخلينى اتعب


ناس كتير اوى فى حياتى
مش كتير اوى كعدد ...بس كتاثير
العدد فى حياتى قليل .. بس اللى بيدخل صعب اوى يخرج
ناس كتير مش قريبين من بعض .. بس عمرى ما احتاجتهم و ملقتهمش
فيهم واحد ... لو قضيت عمرى كله اشكره على حاجات كتير اوى مش هيقضيه
وناس قريبين احتاجتهم و ملقتهمش
ومقدرش استغنى عن الاتنين


عاجبانى اوى الاغنيه اللى حطاها فى البلوج
and the 7th thing i hate the most that you do
you make me love you

فكره عجيبه
بس عايزه اسال كل الناس
ايه الـ 7 حاجات اللى بتكرهوها فيا
بصراحه ... مع وعد منى انى مش هزعل
دى دعوه لن تتكرر للتشريد

ولو انها صعبه
ياريت تدوروا على 7 بتحبوهم كمان (A)
والدعوه عامه

4 comments:

Anonymous said...

إيه ؟!

أنا آسفة..ممكن أرد يا نانسي

معلهش هضايقك


بس بقولك


سلامتك..شكلك تعبانة :)


فسلامتك بإذن الله :)


>>>>>>>


بعتذرلك لأني أكيد مليش أنا في السؤال الأخير :)



بس سلامتك :)

Nourhan Sirag said...

بكره فيكي الافلام اللي بتحبي تعيشي نفسك فيها
مشوفتش حد بيفكر 24 ساعه في اللي بيتعبه
الناس كلها بتحاول تبعد عن اي حاجه تضايقها
وبتحاول تنسى
انتي بقى مصره متنسيش

كفايه كده عشان متضربينيش :D:D:D

واكتر حاجه بحبها في هي طييييييييبة قلبك :D:D
بجد والله بحسك طيبه اوي
وبتتحملي اللي قدامك لاقصى الدرجات
وجدعه بجد

كفايه عليكي كده بقى

Nanoz said...

ايمان : قلتلك قبل كده ردى براحتك من غير اعتذار ولا هضايقك
البيت بيتك :D
والله يسلمك يا حبيبي و يخليكى

Nanoz said...

نورهانتى : انا بعيش نفسي فى افلام يا بت :|
abzlutly
لو بايدى انسي و اشيل فيشه دماغى و ابطل تفكير مش هتردد لحظه
بس دماغى شغاله طول الوقت لوحدها عرض مستمر .. و طبيعى حياه لذيذه زى اللى عايشينها دى .. الحاجات اللى هفكر فيها هتتعبنى

عيب عليك يا حبيبي ما عاش اللى يضربك :D

هى وصلت لتيمو حبيبك :P
ياختى شالله يخليكى ليا
مش عارفه من غيرك كنت هعمل ايه