Nourhanty (L)...

بقالى فترة طويله عايزه اكتب البوست ده
بس المشاغل بقى (H)
ده طبعا غير الكسل البشع :D

بس كمان مش عارفه اقول ايه
بقعد كده قدام الصفحه و اتنح و معرفش اكتب ايه

انتى مش عارفه بجد انا بحبك قد ايه
ومش عارفه كنت ممكن اعمل ايه من غيرك
عشان انتى ربنا بعتك ليا و هونتى عليا كتير
و وقفتى جنبى اكتر
جدعه و طيبه و حنينه و احسن اخت و صاحبه اى حد ممكن يتمناهم

والمشكله اننا باهتين على بعض فى كتير حتى فى الفقر و الشر
وبتعدى ايام حلوه و ايام تانيه لا
بس كله بيعدى
زى ما الحلو بيعدى كمان الوحش بيعدى
بس المهم اننا فى الحلو والوحش مع بعض
ووجودنا ده هو اللى مش هيعدى ابدا ان شاء الله

عشان انا بجد بحبك اوى اوى
وبموت فيكي يا وليه انتى
ربنا يخليكي ليا يا رب و ميحرمنيش منك ابدا
و يحلي كل ايامك و يوفقك للى فيه الخير دايما و يسعدك يا حبيبي يا رب

Fazlakat....

هو و هى بيهزروا بغلاسه على بعض
هى فجأه سكتت و خدت جنب
هو هيتجنن
هو: انتى اتضايقتى؟
والله انا بهزر
طب انتى بجد مش زعلانه منى
وبعدهم تليفونين و رساله
عشان هو يتاكد ان هى مش زعلانه و يقولها انا اسف
بجد اسف

السؤال بقى ... هو ازاى جميل اوى كده؟؟؟؟


****************


من كتير اوى شاغلنى موضوع ازاى ناس بيكون عندهم القدره انهم يحولوا كل البشر فى حياتهم لنسخ متطابقه على اختلاف شخصياتهم الحقيقيه ...
ازاى بيوصلوا كل الناس لنفس المكان .. و يخلوهم يقولوا نفس الكلام
بطرق كتير اوى .... بتبدا بالابتزاز العاطفى و مش بتنتهى فى مكان
بس انا مش فاهمه بجد ايه المتعه فى كده
بالعكس... دى حاجه وحشه اوى اوى اوى
الكلام بيفقد معناه و طعمه و بيفقد كل حاجه
بيبقي بس كلام ... ملوش اى قيمه
من كتر ما بيتقال
من كتر ما كل الناس بتقوله... بقي ماسخ
وبننتهى باحساس الملل من حياه مبتذله و ماسخه
عشان فيه كلام مينفعش يقوله الا حد واحد بس
مينفعش نحسه الا من واحد بس
لو الحد ده قاله بنملك الدنيا و اللى فيها
بس اما يبقي عادى ... و كل الناس تقوله .. بيبقي ماسخ و سخيف و يخنق
بس العيب مش على الناس
العيب على اللى ماشي يخلى الناس كلها عرايس خشب بيرددوا اللى عايزه
اه من قلبهم و هما مقتنعين باللى بيقولوه ... بس عشان هو حطه فيه

اسطوانه محفوظه بتتسمع لكل الناس مش مهم هما مين
مش مهم الكلام مقصود ولا لا
كلام ملوش اساس
يطلع عليه النهار يتمسح و يتنسي و يتغير
و يبقي فيه كلام جديد
عكس كل اللى اتقال قبليه
والاتنين زى بعض .. الاتنين اسطوانه بتتقال للكل.. مش مهم مين
بس اهى الشبكه بتترمى و اللى يطلع فيها بقى نبقي نشوفه بعدين
اللى عايزينه نخليه و اللى مش عايزينه نرميه


****************