Sunday, November 23, 2008

ثقافه الواجب و الجميل

من ثقافات الشعب هنا .. هو الواجب و الجميل

لازم كل واحد يعمل الواجب .. عشان يرضي ضميره و يريح نفسيته
مش مهم اى حاجه تانيه
بس اهم حاجه الواجب

مش قادره استوعب ... ازاى 30 واحد يقفوا على باب رعايه مركزه و عايزين يدخلوا يشوفوا مريض
هو يعنى مريض فى رعايه مركزه هيبقي فى دماغه يستقبل كل الناس دى
ولو اتكلم مع كل واحد شويه .. و سلامتك و ازيك و ايه اللى حصل
والجيران و القرايب و المعارف و معارف المعارف
مش مهم اللى تعبان و مش مهم ان فى مرضى تانين فى الرعايه
المهم كل واحد يعمل الواجب .. و يتحرق اى حد تانى

حاجه تانيه بتحرق دمى فى موضوع الواجب و الجمايل دى
انا بكرهها و مش بتعامل بها .. ولا بعرف اتعامل بها على اساس انها عمله متبادله زى ما الناس بتعمل
فلان عمل لى كذا .. ابقي اعمل له كذا
وده له عندى واجب ... و ده عليه ليا واجب
ممكن اكون ناكره للجميل ... بس اللى بيتعامل معايا بمبدا الجميل كعمله متبادله
ولا بيفرق معايا فى اى حاجه ولا كانه عمل اى حاجه
و بكل صرحه اكتر ... مش عايزه منه حاجه ..
لان بكل بساطه الله الغنى .. عن جميل من اى حد

الحاجه الوحيده اللى افهمها و اقدرها و احط صاحبها فوق دماغى
انه يكون بيعمل الحاجه من قلبه ... ان حد يهتم بيا و يبقي من جواه عايز يبقي جنبي
حتى لو ظروفه مسمحتش يعمل اى حاجه ...
انه من قلبه مهتم .. بيخليه عندى اهم و احسن مليون مره من حد بيتعامل من بره قلبه بس عشان الواجب
لكن موضوع الواجب ده بيفقعنى و ينزل اللى قدامى من نظرى مش بيعليه

مش عارفه ... فى حاجات بسيطه اوى بتعلى اللى قدامى فى نظرى
وحاجات ابسط بتخلينى مش عارفه
حاسه فى ناس كتير مفتعله


3 comments:

Fatma said...

الف سلامة على بابا يا نانسي

ربنا يكمل شفاه يا رب ويعفو عنه

معلش اعذري الناس كويس انهم بيفكروا يردوا الجميل ويعملوا الواجب ويسألوا حتى لو من باب رد الجميل ومش من قلبهم

دا بردو يدل على ان لسه في ناس عندها احساس حتى لو من نوع مختلف

Anonymous said...

ربنا يكتب كل خير,بعيد عم كل ده

Nanoz said...

الله يسلمك يا رب

عاذره الناس بجد ... بس اما بتفكرى مع نفسك بتلاقي عندهم احساس من نوع مختلف .. نوع مادى .. مش قادره اسميه احساس

بس احسن من مفيش برده