Friday, October 31, 2008

المــنــطــق


ما هو المنطق يا مرسي ؟؟
اشهر افييه فى مسرحيه مدرسه المشاغبين .. يليه افييه مرسي الزناتى اتهزم يا رجاله
بس تفتكروا مرسي اتهزم عشان معرفش المنطق ... ولا لو كان موجود الايام دى و حاول يمنطق الحياه
كان هيتهزم هزيمه اكبر من اللى اتهزمها .. و كان هيقول الحمد لله على نعمه الجهل

اصل صعب اوى تحاول تفهم الدنيا ماشيه ازاى .. او تفهم المنطق اللى ماشيه بيه
حاجات كتيييير اوى ملهاش ادنى علاقه بعم المنطق ده
ولو حاولت طول حياتك انك تمنطقها برده هتفشل
زى المشاعر مثلا ... لا بتعرف انت حبيت ده ليه .. ولا كرهت ده ليه ..
ولا تقدر تتحكم فى مشاعرك ... و تقول لها حبى ده و اكرهى ده ...
ولا برده بتفهم الناس ليه حبتك وليه كرهتك و ليه بتتحول ...
سيبك من ده كله ... حتى لو معرفتش الاسباب ... برده مفيش منطق بيحكم العلاقه
بمعنى انك متقدرش تقول لو فلان حبنى مكانش عمل كذا
ولو علان كان بيكرهنى مكانش عمل كذا
ممكن تعشق حد و تؤذيه ... و ممكن تكرهه و تقف جنبه ...
عشان المشاعر لا تمنطق ...
مكتوب فى كل الكتب برده ان كل الاهل بيحبوا ولادهم ...
بس افتح اى صفحه حوادث فى اى جرنان .. هتلاقى اهالى بيدمروا ولادهم مش بس بيأذوهم
بس الناس بتتصرف بطريقه غريبه ... ممكن تبقي عايز الحاجه
وتتصرف عكس ما انت عايز .. لمجرد عند .. و تنتهى بتدمير حاجات كتير
عشان فى حاجات العقل بيقف قدامها عاجز ... و التصرف بيسبق التفكير
ممكن اتنين يحبوا بعض اوى ... و يتصرفوا مع بعض بمنتهى الغباء ... و يضيعوا بمنتهى الغباء برده كل فرصهم
وكل ما واحد يقرب التانى يبعد

ممكن تبقي عارف انك ماشي فى طريق سد ... تمشي فى طريق عارف ان فيه نهايتك
عارف و شايف و فاهم .. مش مغيب ولا حد ضاحك عليك و مشربك حاجه اصفرا
بس بتمشي و تكمل للاخر ... و انت عارف ان كل خطوه بتمشيها .. كل الطرق اللى وراك بتتقطع
وبيبقي مستحيل الرجوع ... و الطريق قدامك مسدود .. و برده بتاخد خطوات لقدام و بتكمل
وتتعب و تنهار و برده مش قادر تمنع نفسك

ممكن حاجات كتير اوى بس ببساطه لو فكرت تدور على منطق و اسباب مقنعه ليه الناس بتتصرف زى ما بتتصرف
ليه الدنيا بيحصل فيها اللى بيحصل
هتلاقى نفسك فى متاهه ... تايه بتدور على كل الابواب .. بتفكر فى السبب و نقيضه ... بتدور على كل تفسير ممكن
و تشك فى كل اللى تعرفه ... و تكفر بكل البديهيات فى الموضوع و تشك فى كل حاجه
وتتوه اكتر ما انت تايه
يعنى فعلا مرسي لو كان عرف المنطق و حاول يطبقه على الحياه ... كانت اتهزم يا مينززززز اكتر من هزيمته الاولى



Friday, October 24, 2008

دمـــــاغــى

لسه تفكير الناس عنده القدره انه يصدمنى .. و دى صدمه فى حد ذاتها
ماما : خالتك جايبه عريس لهديل
انا : طيب
ماما : ده معيد فى الكونسرفتوار .. مامته صاحبه خالتك .. و قالتلها انها عايزه عروسه بيضا لابنها
فخالتك قالتلها على هديل
انا - فى بلاهه - : نعم ! ..مامته .. خالتى .. عروسه .. بيضا .. بيضا !
ماما : هو ده الجواز اللى بينفع ... مش تقولوا حب و مش عارفه ايه ..
انا - لسه فى حاله صدمه - : بيضا .. بيضا ..
ماما - وهى محسسانى انى غيرانه و ان مشكلتى مع حكايه بيضا عشان انا سمرا و منفسنه و جوايا احقاد دفينه - : ايه المشكله يعنى ؟
انا : انتى بتهرجى .. ده لو واحد كبير و بيخلى مامته تشتري له لبسه .. يبقي حبيب ماما
يقوم يخلى مامته تدورله على عروسه ... و المهم فى الموضوع انها تكون بيضا


______________________________


مش قادره افهم بجد ازاى الناس لسه بتفكر كده .. ازاى حد يقبل يتعامل بالطريقه دى
عايز قميص مخطط ..
انا عندى واحد ..
طب هاجى اعاين .. و بين البايع و الشارى يفتح الله ..
و يباركله يا معلم

____________________________

ماما عندها اقتناع ان دماغى جايه من عالم تانى .. و انى هفشل فى حياتى ..
لانى متخلفه و مش مقدره الاساليب الصحيحه فى الجواز ..
ده غير انها كل ما تفتح الموضوع اصلا بجيبلها احباط و اقول لها افقدى الامل
انا مش عايزه اتجوز .. و مش بفكر فى الموضوع
لانى ببساطه متاكده انى مستحيل اتجوز بالطريقه دى .. او اعيش حياه عاديه
او اكون زى ملايين الناس اللى مربوطين فى ساقيه روتينيه .. ليلهم زى نهارهم
فبجيبلها احباط و اقول لها انا قاعده لك يا حبيبتى


_____________________________

مش عارفه ليه .. عمرى ما اتصدمت فى حد
يعنى ممكن موقف يصدمنى .. لكن عمرى ما حسيت انى اتخدعت فى حد
يمكن لانى ببقي عارفه من الاول .. و ببقي عارفه اللى هيحصل بعدين
الغريب انى بكمل ... بحب اجرب بنفسي ... و مش بندم على حاجه
بالعكس بحسها اهانه ليا لو قلت انى اتخدعت فى حد .. عشان ساعتها العيب فيا انا عشان ساذجه
بس بالعكس .. عمرى ما غيرت رايي فى حد .. دايما احساسي الاول بيطلع صح
ورايي فى اللى قدامى مش بيختلف .. عشان بعرف اقدر اللى قدامى كويس و بعرف قيمته صح

___________________________

مؤمنه ان اغلاط الاخرين لا تبرر اغلاطنا
وان حتى لو غلط غلطه صغيره و اللى قدامك غلط غلط كبييييير
لازم تعتذرله ... عشان انا نفسي مش حد تانى
مش مقتنعه ان حد يمنعنى اكون نفسي عشان احتمال يتفسر تصرفى بطريقه مختلفه
مش قادره اقتنع ان المبادئ بتتجزئ
اللى غلط ... لازم يعتذر .. حتى لو هضيع حق ليا
مينفعش اخد حق حد
مؤمنه بـ
Taking the high road
مش بقدر اكره حد حبيته ... و بسامح فى حاجات كتير
مش المفروض يتسامح فيها ... بس مقدرش اكره و اشيل سواد من حد
بسامح بس مش بنسي
اتقال لى انى كده هبله و ضعيفه ... بس مقتنعه ان دى منتهى القوه


________________________

حاسه انى زى بالونه مليانه ميه ... بس مليانه خروم
كل ما اسد واحد الاقى غيره 10 ....
بقيت لا احتمل بجد ...
انا شخصيا مش متحمله نفسي
محتاجه اجازه من نفسي
بعدها اجازه مع نفسي
و بعدها افكر ارجع للدنيا و الناس ولا لا

عشان محدش له ذنب يتحملنى و انا بالحاله المستفذه دى


نفسي اخد اجازه من دماغى بجد و اشيل الفيشه و ابطل تفكير
عشان مش ينفع اتعب اكتر من كده
ارجوك متبسطهاش اكتر من كده

Tuesday, October 21, 2008

صدق رسول الله


عن عبد الله بن عمرو بن العاص رضي الله عنهما أن رسول الله صلى الله عليه وسلم قال :
أربع من كن فيه كان منافقا خالصا, ومن كانت فيه خصلة منهن كانت فيه خصلة من النفاق حتى يدعها :
إذا اؤتمن خان, و إذا حدث كذب ,وإذا عاهد غدر , و إذا خاصم فجر "


عــن أبـي هـريـرة رضي الله عــنـه أن رجــلاً قـــال للـنـبي : أوصــني. قال: { لا تغضب } فردد مراراً ، قال: { لا تغضب }. [رواه البخاري]

Sunday, October 19, 2008

وحيد فى وسط الزحمه



اكتر مكان بحس فيه بوحده قاتله ... هو فى الزحمه
وانت واقف مع ناس كتير بيتكلموا و يضحكوا ..
بس انت حاسس ان ده مش مكانك
you just don't belong
بتضحك و ممكن تتكلم ... بس انت لوحدك .. مع نفسك
بتفكر .. بتراقب .. بتتفرج على الناس
بيتكلموا مع بعض ازاى .. عينيهم بتقول لبعض ايه ..
بيقولوا اللى لسانهم مش بيقولوا
واحد عينيه بتلمع كل ما يشوف واحده .. كل نظره بتقولها بحبك بجد ..بس لسانه مش بينطق ..
واتنين عينيهم بتقول انهم مش بيطيقوا بعش بس واخدين بعض بالحضن .. و حبيبي و ابن حبيبي
ناس تشوفهم .. تحس انك مستريح نفسيا .. ممكن تكون متعرفهمش كويسو مفيش بينكم كلام .. بس بتحب تشوفهم و تبقي مبسوط قوى لما تتكلم معاهم
و ناس تانيه تشوفها .. عفاؤيت الدنيا كلها تركبك و متبقاش طايق نفسك .. مع ان ممكن برده ميكنش بينكم معرفه
و تحتار انت ...طب انا مين فيهم ؟؟
انا بحب اتفرج على الناس .. بعشق مراقبه النفس لبشريه
يمكن عشان بتعلم و بشوف و بفهم حاجات .. مش ممكن افهمها من حياتى لوحدها
عايزه اعيش مع الناس و اعيش مع نفسي
مش عايزه اتفرج على الدنيا من بره
بحب الناس .. و بحب انهم يحبونى ...
بس برده ببقي وحيد فى وسط الزحمه

رســــالــــة الـــــى مــجــهـــول



مش بعرف اكتب شعر و كلام مزوق ... بس بحبك
من قبل ما اعرف اسمك ... بحبك
من قبل ما اعرف اسمى ... بحبك
من قبل ما اعرف اتكلم .. افهم .. او حتى احب ... و انا بحبك
احساسي بيك اقوى من احساسي بنفسي و الكون
حبك جوه قلبى ... بيكسره و يداويه
بيكسره عشان بيحبك من غير ما يعرفك
و بيداويه عشان حبك هو الحياه لقلبي




اسفه يا حبيبي .. اسفه على كل كلمه بينطقها لسانى لغيرك
اسفه على كل نظره و همسه و ضحكه لغيرك
جنون انك تحس انك بتخون حد لسه متعرفوش
بس قلبي يعرفك ... حتى لو باقي حواسي مشافتكش
بس انت بس اللى من حقه يشوف ضعفى .. رومانسيتى .. انوثتى
لو حد شافهم غيرك .. هحس انى بخونك
وانا مقدرش اخونك ... مقدرش اسمح للنسمه تجرحك .. انا اموت قبل ما انا اجرحك
انت اللى فاهمنى ... عارفنى ... حبيبي انا .. انا و بس
مش مهم تكون الرجل الخارق .. المهم تبقي راجل
الرجل بتاعى انا




انت اللى ممكن تسعدنى و ربنا يعوضنى بيك عن كل لحظه حزن عشتها
نظره من عنيك بالدنيا و اللى فيها .. بحياتى قبلك كلها
بس يا رب ما يبقي فى حياتى بقيه بعدك
معاك بنسي حريتى .. بنسي نفسي



انت قلبى .. ابنى .. حبيبي .. ابويا .. صديقي .. اخويا .. كل دنيتى
الناس ممكن متفهمش .. بس انت فاهم
البنت اما تحب بجد .. حتى لو كانت رئيسه دوله
بتبقي ست امينه ... لسي السيد
مش خوف ... ولا غصب ... بس حب
احنا بنبوس ايدين و رجلين الاطفال و بنخاف عليهم
عشان بنحبهم ... و بنبقي فى منتهى القوه
ضعفي قدامك .. فى حضنك .. منتهى القوه
انا بحط ماسك القوه و التماسك قدام العالم .. عشان انت معايا
فى ضهرى و جنبي و حواليا
انت الامان .. فى عالم مفيهوش امان
انت كل اللى ليا



انا عارفه انى مستهلكش ... عشان انت تستاهل احسن واحده فى الدنيا
بس انا عارفه ان مفيش واحده ممكن تحبك قدى
و بدعي ربنا .. ان حبى لك يعوضك و يكفيك
ولو ان حتى حبى لك .. ميجيش نقطه فى بحر من اللى انت تستاهله
نفسي اديك الدنيا و ما فيها
عشان انت حبك الدنيا و ما فيها ليا



كان نفسي ...
اعرف اقول شعر .. بس كل اشعار الدنيا مش كفايه عليك
كل مزيكا الدنيا مش كفايه عليك .. كل الروايات اللى اتعملت و اللى هتتعمل
متقدرش توصف احساسي بيك
نفسي تأمر .. وانا انفذ ..
بحبك و انت قوى ... و انا ضعيفه و قوتك بتحمينى و محوطانى
و بحبك و انت ضعيف .. بين ايديا .. فى حضنى
قلبى اللى هيتكسر مع كل دمعه منك .. هيقوينى لحد ما تقف على رجلك و تبقي اقوى من الاول
بحبك فى ضعفك اكتر من قوتك .. اذا كان ممكن حبك فى قلبى يزيد
بحبك فى مرضك قبل صحتك
فى فقرك قبل غناك
الناس بيقولوا ان الفقر اذا دخل من الباب الحب يخرج من الشباك
بس هما ميعرفوش حاجه
ميعرفوش انى واثقه فيك واثقه
انك هتقدر تحول الفقر... غنى
عشان انت طموح .. ذكى .. قوى .. و مع حبنا و صبر
هنقدر نحقق كل احلامنا انا استحمل اى حاجه عشانك ... عشان بحبك بجد
اى حب و حنان اى حد شافهم منى او من غيري ... ولا حاجه بالنسبه للى شايلاه ليك



عايزاك مجنون .. و عاقل .. حنين .. و قاسي .. تقتحم الاسوار اللى بنياها حوالين قلبي
اعرفك زى كف يدي و اكتشف فيك حاجه جديده كل يوم
كل يوم تبهرنى .. و احمد ربنا انك من نصيبي
عايزاك مجنون و انا عاقله
عاقل و انا مجنونه
تكملنى و اكملك ... لا الجنون ياخدنا ولا العقل يحبطنا
حنين عليا اكتر من امى
و قاسي ... تنسي حنيتك و تلبس قناع القسوه عشان تحمينى من الغلط زى ابويا

احــســاس



اكتر احساس بيقتلنى .. بكره الضعف .. مش بحب حد يستضعفنى .. يدوس عليا
بتخفى ضعفك جواك .. و تظهر قدام الناس قوي ..
ممكن تعمل الحاجات اللى كانت بتتعمل فيك .. عشان تبين للناس كلها انك مش ضعيف ..
محدش ممكن يدوس عليك .. تبان جامد .. قاسي .. مفترى حتى ..
فى الوقت اللى انت فيه هش .. ضعيف .. و خايف ..
خايف يتداس عليك .. خايف قوى ..
طول الوقت قدام عنيك احساسك و انت قاعد فى ركن بتتفرج على الناس ..
و هما بيضحكوا و انت لوحدك بتعيط ..
و الناس تيجى تدوس عليك و تضحك .. بس المره دى بيضحكوا عليك ..
بيضحكوا على ضعفك و بيدوسوا عليك .. و انت تبكى اكتر .. و هما يضحكوا اكتر ..
لحد ما تقول لا .. مش هبكى تانى .. هقف و اقول انا ميهمنيش حد ..
مش عايز حاجه من حد ... هبنى اسوار حوالين نفسي .. محدش ممكن يعديها و يجرحنى ..
هبان قوى .. هضحك عليهم انا .. هبان قاسي .. بس مش ضعيف ..
اقسى لحظات ممكن تعدى عليك اما قناعك يتهز .. و حد يستضعفك تانى..
حتى لو انت فعلا اضعف منه .. بتحارب و تقاوم .. مش مهم تتأذى اكتر ..
مش مهم تحمى نفسك ... المهم ان محدش يحس بضعفك ..
تقع و تقف .. تاخد ضربه توقعك تانى و برده تقوم..

انت عارف انك مش قده .. بس مش هتستسلم و تحسس اللى قدامك بقوته عليك ..
الموت اهون !!! .. حتى لو هو متأكد .. مش هتديله اعتراف يريحه ..
لا انت الاقوى .. و هتقاوم لاخر نفس .. لانك بتكره الضعف ..
و احساسك بالعجز بيسرق صوتك .. و بيخليك تصرخ من غير صوت ..
بيحبس دموعك فى عنيك .. و تبكى من غير دموع ..
تقف فى وسط ميدان مليان بشر .. تحاول تكلمهم و تشاورلهم ..
تعمل اى حاجه .. بس محدش حاسس بيك .. شايفك .. او سامعك ..
و انت عاجز عن عمل اى حاجه حتى دمعه تريحك ...
خنجر فى وسط قلبك كل ما تحاول تشيله يجرح اكتر و يرشق اكتر
و يتحط معاه 100 غيره .. و انت عاجز ..

Saturday, October 18, 2008

اللى على راسه بطحه


مثل سخيف ... بس حقيقي ..
اللى على راسه بطحه بيحسس عليها ..
الغريب بقي انه حتى لو مش عارف ان عنده بطحه ..
برده هيحسس عليها ...
انا مش فاهمانى ... و مش عارفانى برده ..
فيا كميه تناقضات رهيبه ...
و ساعات بعمل تصرفات غبيه و زباله ..
حاجات بنتقضها فى الناس و بتعصبنى منهم ...
و بلاقيها فيا ...
مش عارفه ..
انا مش ملاك ولا بريئه ... بس برده مش كلى زباله ..
يمكن اللى بيشفعلى انى حتى اما بتصرف بطريقه خبيثه او زباله
بيبقي مش قصدى .. مش قاصده اتصرف بخبث و غباء
بس ساعات بنتحط فى مواقف و تتصر و خلاص من غير تفكير
فيا عيب غبى و بكرهه جدا ...
مش بعرف اتكلم مع حد متضايقه منه ...
و الاغبى من كده ان الموضوع بيبقي شاغل كل تفكيرى ..
فمش بتكلم غير عنه ... بس مش مع صاحب الموضوع ..
زى اللى حصل مع الناس الظريفه بتوع الكليه ..
اما اكتشفت انهم بياخدوا درس مع دكتور الماده اللى انا كنت ضايعه فيها
و كنت كل ما اقول لهم هتعملوا فيها ايه .. يردوا بمنتهى البرائه ... هنقراها ..
ساعتها اتجننت مش عشان الماده .. بس عشان اكتشفت ان اللى كنت فاكراهم صحابى
و بقضى معاهم وقت اكتر من اللى بقضيه مع اهلى .. و بنخرج سوا و بيننا عيش و ملح
انى فى الاخر مسواش عندهم حاجه ... و مش فارقه معاهم ..
كان كل اللى يكلمنى .. اكلمه فى الموضوع ده ..
بس عقبال ما شفت الناس دى تانى كنت نسيت و اكتشفت انهم معملوش حاجه غلط !!
هما ماجرموش عشان انا مش فارقه معاهم .. الحب مش بالعافيه ..
فقررت اتعامل معاهم كزمايل عادى ..
بس طبعا كان وصل لهم انى كنت متضايقه .. و بعدين لاقونى بتعامل عادى ..
بقي شكلى منافق .. مع ان الموضوع مش كده ..
انا ببقي حاسه الحاجه فى وقتها و بعملها و اقولها ..
وبعدين خلاص بنسي و مش بحط الموضوع فى دماغى ..
هو طبعا غلط انى اعبر عن اللى حاسه بيه ده مع ناس تانيه غير اصحاب الموضوع
بس مش عارفه .. مش بعرف اتعامل مع حد و انا متضايقه منه ..
غباء ممكن .. بس مش خبث ...
بس حتى فى ده انا بدافع عن نفسي ... و بجمل زباله فيا ..
بس غريب اما تتعامل مع ناس .. حلوه مع الكل ..
ادب و اخلاق .. و ذوق و سكر ..
و يجوا لحد عندك ... طريقه تعامل سخيفه و قله ذوق .. اكنك شخصيه لا تطاق
مش عارفه بيعملوا كده ليه ... نفسي افهم
مش عايزه حد يشوفنى ملاك ... و فى نفس الوقت اكيد مش عايزه حد يشوفنى زباله
انا بشر ... جوايا زباله و جوايا حاجات تانيه كويسه ..

Carma

Carma

What goes around ... Comes around

طول عمرى اسمع عن الـ Carma

لحد ما حصل لى شرف تجربتها ..

وياريتنى ما جربت ...

شيئ سخيف اما تتحط فى نفس الموقف مرتين ..

و المرتين متطابقين و فى منتهى الاختلاف ...

هو هو نفس الموقف بغباءه .. و سخافته ..

بس مع تبديل الاماكن ..

و تعمل مثلث ظريف ... من 3 اضلاع
طبيعى يعنى اى مثلث بيبقي 3 اضلاع ... اى عيل فى kg يعرفها

المهم المثلث الظريف بيبقي متكون من سيادتك ... و الاستاذ س
وتعيش الموقف و يعدى

و للمفاجأه المفرحه .. انك تعيش نفس الموقف تانى
بس انت بقيت س .. و ص خد مكانك

و تلاقيك انت حاسس بنفس احساس س .. و بتقول نفس الكلام و تتصرف بنفس الطريقه ..
فتعذر س ... و تتضايق من نفسك و من طريقتك معاه
و لسخريه القدر زى ما بيقولوا
تلاقى ص بقي انت .. بيفكر زيك .. و يتصرف زيك .. و يعمل نفس ردود فعلك ..
وتعذر ص برده عشان انت عملت زيه بالظبط فى س

و ينتهى بك الامر انك تعذر الاتنين ... و تكره نفسك ...

وتبقي عايز تهرب ... تهرب من س و تهرب من ص
وكل الحروف اللى اخترعوها
تهرب من كل الناس ... مش عايز تعرف حد
مش عايز تكلم حد ...
عايز تبعد عن كل الناس و تعيش مع نفسك ..
فى سلام ... هدوء .. من غير تفكير .. و لا توتر

بعيد عن الـ Carma ...

may be


i need to be angry at you
cause may be ,, just may be this will make me love you less
miss you less
or even make me able to stand your absence

but even if i became angry at you
this would just make me love you more
miss you more
and nothing can make the pain inside my heart go away
or even minimize it

i love you
like no one have ever loved before

the distance between us is killing me
cause even with all this distance
even when i know that there is no hope for us
i love u more each second
i miss u
and i just can't think about anything or anyone else but you

everything i think about leads me back to you
everything is about you
cause you are the most important to me
you are my first priority
you are my only priority

i want to stop loving you
but i can't
loving you hurts so bad


but this is nothing compared to the pain of just the thought of not having you in my life

this is not me

i have changed ,,, all my walls are coming down
i am so vulnerable ,, weak ,, and i don't even care
i only care about you

may be you don't give a damn about me
may be you care about me too

but for sure
you don't care the same way i do

im losing my mind ... my sanity
and i don't care

all this is nothing
it vanishes whenever u r happy
whenever u r sad
whenever u r anything

cause whenever u r happy ... ur happiness lightens my world
and whenever u r sad ... neither i nor my pain matter
the only thing that matter is you

i think im losing myself
and i don't even care

الدماغ فيها ايه ؟؟


هى الدماغ فيها ايه ..
مش عارفه ... هى فيها حاجات كتير و مفيهاش حاجه
فى احلام و اوهام و افكار .. امل و عزيمه و اصرار و يأس و كسل ..
حب و غضب .. و جنون ...

و اسئله
اسئله كتيره ...

هو انا عبيطه ؟؟
ساعات بحس انى عبيطه و ساذجه ...
او حد فاكس ..
وساعات بحس انى حد قاسي ...
ان قلبى مليان قسوه ... بتطلع على ناس من غير ذنب ..

بس انا لا كده و لا كده ...

انا بنت عاديه ... فى منى كتير ..
مش اميره الحفله ... اللى البطل بيحلم بيها ..
و يخلص الفيلم برقصه شاعريه ..
بس برده مش البنت الشريره اللى بتخسر فى اخر الفيلم ..

انا البنت اللى محدش بياخد باله منها .. وممكن حد ياخد باله قبل اخر الفيلم
و ممكن الفيلم يخلص من غير ما حد ياخد باله ..
بس اصلا ميهمنيش الفيلم ..

انا عايزه اعيش حياتى ... بكل ما تحمله كلمه اعيش من معانى ..
عايزه الف و ادور ... و ازور اماكن كتسر و اقابل ناس اكتر
وحشين و حلوين ... لانى هتعلم من الاتنين و افهم حاجات اكتر
عايزه اتعب و افشل و انجح ..
لسه محددتش انا عايزه اعمل ايه ... بس اللى متاكده منه انى عايزه اعمل حاجات كتير
معنديش ادنى استعداد انى ابقي حد روتينى عايش حياه سخيفه
نهارى زى ليلي و امبارح زى انهارده
لا كل يوم .. يوم جديد و حلم جديد .. بس محتاجه اتحرر من حاجات و قيود كتير الاول
بس هانت ... هانت قوى


معلقه معايا اليومين دول اغنيه اليسا
من كتر حبى فيك خلاص انا قربت اكرهك .. عشان مش عارفه اكتر من اللى عملته اعمل ايه

مش عارفه اذا كنت ممكن اوصل للكره
بس بيتهيالى انى هبعد
انا عمرى ما بعدت عن حد .. مهما كان الحد ده عمل ..
عمري ما اخدت قرار انى ابعد عن حد
كنت بستنى اما الطرف التانى ياخد القرار ده ..
مش عشان انا بموت فيهم و هما مش طايقيننى ..
بس مبعرفش اسيب حد محتاجلى .. او مش ضرورى محتاجلى .. مش بعرف اتخلى عن حد و خلاص
مهما كانوا اذونى

بس ممكن اخد القرار ده مع حد بحبه
عشان لما تبقي مش عارف تتصرف مع اللى بتحبهم
كل حاجه بتبقي بتالم قوى
الزعل بيالم ...و الفرح كمان بيالم ...
وانت عاجز .. مش عارف تتصرف ..
مش عارفه هقدر اخد القرار ده ولا لا

بس لو خدته
اعرفوا كويس انى ببعد مش عشان بكرهكوا او مش طايقاكوا
بس عشان بحبكوا زياده عن اللزوم
ومبقتش قادره اتحمل بجد
تعبت قوى

Can't take a Complement !!!


يا سبحان الله
الناس كلها المفروض تتبسط اما حد يشكر فيها
انا بقي لا
زى ما مش بحب حد يشوفنى اقل من ما انا
مش بحب حد برده يشوفنى احسن ما انا شايفه نفسي

انا زى ما انا كده .. حلو قوى ...
هتشوفنى اقل او اكتر ليه ...

يعنى اما حد يتجنن و يفكر يشكر فيا
سواء بجد او هزار ... حقيقي او مجامله ..
بيكره اللحظه اللى فكر فيها يعمل الحركه دى
لانى ساعتها مش زى الناس الطبيعين بقول ميرسي و اهمد و اسكت
لا لازم ادخل فى حوار و نقاش حامى حماسي .. عن مدى صحه و خطا المجامله دى
ويا حظه السيئ اصلا لو كان بيتكلم فى حاجه من My insecurities
:D
لازم نتناقش لحد ما حد فينا يزهق ... و يقول للتانى خلاص براحتك


مش عارف
ماما دايما تقول لى مثل سخيف
نص البلد مش عاجبنى و يا ترى انا اعجب مين

مش عايزه اعجب حد يا ستى
فى ناس بتبقي نازله من غير option الاعجاب اصلا
دى نسخ منتشره فى السوق من زمان
مينفعش باى حال من الاحوال انهم يعجبونى
خصوصا لو حد من الستات اللى يطلق عليهم لقب قراشانات عن جداره
تلاقى الواحده منهم ... فى منتهى الحشريه ...
وعملتى ايه و رحتى فين و جيتى منين ... و ليه معملتيش كده ...
وفجاه بدون مقدمات من غير ما تعرف حاجه عنك
تلاقيها بتفتى فى حياتك ... و بتدى شويه حاجات كده .. المفروض انهم نصايح
بس اللى هو انت المفروض تاخدهم ... على انهم امر مسلم بيه و اوامر لازم تنفذها ..
و انتى عايشه كده ازاى ... و انتقادات سخيفه
و المفروض .. تبتسم و تستقبل الكلام ده ...
و تبقي هتموت وتقولهم ما تروحوا تشوفوا ولادكم بيهببوا ايه الاول
بس لو قلت كده تبقي وغد مش متربى

ولا النوع التانى بتاع الناس اللى عايشه دور البرائه قدام الناس
مش بيعملوا حاجه غلط ... و فى منتهى البرائه
ملايكه مش بيمشوا زينا
لا دول بيطيروا
ومن ورا الناس بتحصل بلاوى ... بس فى السر
واللى يبقي صريح و واضح ... و مش بيعمل نفس الكوارث دى
ولا حتى ربعها
بس مش بيعمل حاجه فى السر ... يبقي فاسق لعين

اه طبعا ميعجبونيش
ولو انا عجبتهم ... يبقي لازم اعيد النظر فى نفسي
لانى ساعتها لازم اتاكد انى غلط

اسكت يا لسانى ... شيئ لطيف انك تبقي لسانك طويل
بس اهو الواحد بيحاول يقلل لماضه و يقصر لسانه
برده اهله ملهمش ذنب .. لانهم مضطرين يتعاملوا مع الناس الغريبه دى

الانــســـان

الانسان كائن غريب جدا

بيعيش حياته يدور على حاجات ... و هى قدام عنيه طول الوقت
بيدخل حياته فى متاهات .. ويعقدها بالتفكير
و من كتر التفكير ... ينسي ايه السبب و ايه النتيجه
ويبقي السبب نتيجه و النتيجه سبب
ويدور فى حلول ... و يفكر و يدور .. و اصلا مفيش مشكله

بيدور على حاجات كتير ... بيدور على حاجات حد يقدمهاله ...
بس المشكله عمرها ما كانت فى الحاجه نفسها ..
المشكله فى اللى بيقدمها ...
هو مين ... و مستعد يقدمها فعلا ... و هل هو عايزه هو ولا لا ...
عشان كده ممكن ... تبقي عايش حياتك كلها نفسك فى حاجه ...
بتحلم بيها .. و هى كل اللى انت بتتمناه من الدنيا ...
وحد يبقي عايز يديهالك ... و يديك كل اللى عنده .. و يديك حياته كملن ...
بس انت مش عايزها منه هو ... واللى انت كنت عايزه و بتحلم بيه..
يبقي حاجه بتخنقك .. و تعصبك ... وتندم انك اتمنيتها فى يوم ...
و تفضل برده محتاجها ...
وتلاقى الحد اللى انت عايزه يديك اللى بتحلم بيه ..
بس الحد ده معندوش استعداد يديك حاجه ..
وتلاقى ان ده ملوش اى اهميه عندك ...
عشان انت مش عايز حاجه خالص ..


و عشان كده ابسط الحاجات فى الدنيا ... زى الاهتمام مثلا ..
بنبقي عايزينه من الناس اللى عايزينهم يهتموا بينا ...
ولو حد غيرهم اهتم ...
او الاهتمام نفسه جه من حد انت مش عايزه ...
الاهتمام ده بيبقى بيتعبك .. مش بيسعدك ...

و الخير بيبقي شر
عشان من المكان الغلط

وعشان كده ... الانسان كائن غريب
بيبقي قدامه كل اللى عايزه و يسيبه بايديه

خليك easy و متبقاش over

انت ممكن تخدع بعض الناس لبعض الوقت

لكن مش ممكن تخدع كل الناس كل الوقت

- حقيقه علميه -

ساعات بتحس ان دماغك فيها مليون فكره فى نفس الوقت
بتفكر فى مليون حاجه ...
ملهمش اى علاقه ببعض ...
ومرتبطين جدا ببعض .. فى نفس الوقت ...
وانت مش فاهم اى حاجه طبعا كالعاده ...

ممكن تتحط اوقات فى مواقف غريبه ...
انك تتحط بين اتنين ...
تعرف عن ده حاجات مينفعش تقولها لده ..
و تقف متكتف و انت شايف ان اللى قدامك بيتخدع ..
بس مينفعش تتكلم و تقول حاجه ... عشان اللى قالها لك قالها و هو واثق فيك
حتى لو هو ميستحقش انك تكون قد الثقه دى ...
بس اصلا انت مش محتاج تقول حاجه و لا تخون الثقه دى ..
عشان مفيش حاجه بتستخبى ... و يا خبر انهارده بفلوس بكره يبقي ببلاش ...
واصلا انت غلطان من الاول عشان يا داخل بين البصله و قشرتها ... و مينوب المخلص ..
الا اخر الامثال الشعبيه كلها ...

طيب سيبك من الموقف ده ...

ايه موقفك من الحدود ؟؟؟؟
مش الحدود الدوليه ... و لا حتى الحدود الداخليه و محافظه حلوان ...
بس حدودك الشخصيه ...
امتى تقول لا .... stop ... مش لاعب ..
مش بحب ابقي حد متزمت ... بحب ابقي انسان open minded
وبحب اتقبل الاخر مهما كان !!! ...
بشوف ان من حق اى حد يكون له اصحاب ... ومن حق اى حد ان يبقي له ناس بتحبه ...
حتى لو كان وحش و فيه عبر الدنيا ...
بس حق انسانى لكل واحد ... ان يلاقى حد يحبه ... يحبه بجد من قلبه ...
ومش معنى ان حد بيعمل حاجه غلط ... انه يبقي كده حد وحش ..
طالما انا حد كبير و واعى و مدرك للى بيحصل حواليه ...
ومش بخلى حد ياثر عليا .. تاثير اكبر من اللى انا اسمح بيه ...
ببقى مش بحب اسمع حكايه متصاحبيش الناس دى عشان بيعملوا كذا !!
مش بكون موافقه على اغلب الحاجات اللى بيعملها اصحابى ... ومستحيل انا اعملها !!
بس ده مش معناه انى اصنفهم من حاجه بيعملوها ...
بالعكس الانسان مليون حاجه ... و صوره كبيره ... مينفعش امسك تفصيله واحده و احكم عليه منها
وطالما التفصيله دى مش بتاذينى فى حاجه ... يبقي مليش دعوه ...
مش معنى كده ان اشوف حد بحبه بيغلط و اسكت ... لا اقول رايي و اقول ده غلط ...
بس مليش دعوه انى اعين نفسي قاضى و احكم على حد ...


المشكله مش فى الرغى ده كله ...
المشكله هو امتى تقول لا ... مينفعش ...
انا بستفيد من كل اللى حواليا و بستفيد من التعامل مع الوحش قبل الحلو
لان لولا الوحش مكنتش هعرف اقدر الحلو
وبفهم و بعرف و باخد خبرات تنفعنى بعدين ...
بس فى حاجات مينفعش فيها المنطق ده ...
you have to draw the line some where


اصلا ايه الحدود بين الخير و الشر
انك تبقي انسان كويس و انك تبقي انسان مش كويس
ايه الحدود بين الطيبه و الهبل و السذاجه
ايه الفرق بين المجامله و النفاق و الاشتغال
ايه الحدود مع الاغراب
ايه الحدود مع الاحباب
ايه الحدود للاحلام .. ايه الحدود للافعال
ايه الحدود للحب .. ايه الحدود للغضب .. ايه الحدود للحدود

اما تعيش حياتك بحدود كتيره قوى ... انت محطتش اغلبها
بس مضطر تعيش من خلالها
انت اه محطتهاش بس بقت جزء منك ... انت هى و هى انت ..
تنزل الدنيا ... مفيش حاجه فيها اسمها 1+1=2
مفيش مساله ومعطيات بتطبق القانون و توصل لحل فى الاخر
لازم تبقي flexible مش rigid تبقي لين مش ناشف
كل موقف له قانونه ... كل حاله ... حاله خاصه ...
و تتوه فى وسط حاجات كتير ...
هو انا old fashion ولا انا open minded



خليك easy و متبقاش over

خليك easy و متفكرش .. و ان فكرت .. متفهمش ...
و ان فهمت.. متصدقش ... و ان صدقت ... متحسش ...
و ان حسيت... متتجرحش... و ان انجرحت.. متبينش ..

عشان لو بينت مش هتبقي easy

متفكرش ايه بيحصل ليه ...
متفكرش هى ليه تبقي بتضحك لك ...
وفجاه تديلك بالجزمه ...
متفكرش فجأه ليه كل الناس اللى عرفتهم فى حياتك
عاملوك بنفس الطريقه ...
مع انهم ميعرفوش بعض ...
ومختلفين جدا عن بعض
مفيش مشترك بينهم الا انت ...
متفكرش وانت بقيت بتكره مشاعرك ...
عشان بتخليك ضعيف ...
مشاعرك بتحول كميات الغضب اللى جواك لحب و حنان فى لحظه و بكلمه ...
مشاعرك تخليك تتقبل حاجات عمرك فى حياتك ما كنت تتخيل انك ممكن تتقبلها ..
وتقول لا خلاص ... انا جبت اخري بجد ... و كل حاجه ولها حد زى MTM
وفى لحظه تنسي كل القرارات وكل الكلام ...

متفكرش انت ليه مش قادر تنسي ... او تسامح ...
مع انك بتنسي و تسمح على حاجات تانيه كتير ...
بس اللى مش ممكن اقدر انساه ... ان حد قريب منى يشوفنى واقعه على الارض
واقعه تحت الارض ... و يبص ببرود و يمشى ...
انا اصلا مش عايزه حاجه من حد ... انا قادره اقف لوحدى ..
بس ليه ..... ليه كده ...
اى حب و حنان جوايا بيتحولوا لجمود و برود ... لما حد بيعمل معايا كده ...
عشان مش بقدر استوعب كميه القسوه او الكره اللى تبقي جوه حد ..
عشان يشوف حد فى حاله زى دى و يودى وشه الناحيه التانيه...
ده لو حد غريب فى الشارع ... هيقف يساله مالك ؟؟؟

الدنــيــــا ايــــه ؟؟

الدنيا زى عربيه ... اى سياره .. او اتوموبيل زى الافلام القديمه

المهم ان العربيه دى ... انت الاول بتتولد

وتركبها ... طبعا انت بتتولد حته بتاعه كده متفهمش حاجه فى البتنجان

فمش مش هتتولد تسوق العربيه على طول

لا الاول بتركب العربيه و يتساق بيك

وانت تكبر و تفهم و تتعلم و تعدى بيك السنين

وانت لسه راكب و بيتساق بيك ...
مش بيبقي من حقك اصلا تقول انت هتروح فين او تيجى منين
انت مجرد راكب يا كلب ...
اما تبقي تتعلم تسوق و يبقي عندك عربيتك ابقي سوق انت ..
طبعا تحاول تقنع فمين انك انت مش عايز تمشي فى الطريق ده
بس مش بمزاجك يعنى ... كلم نفسك براحتك ..
واللى عايزينه هيمشي ...
وانت و حظك بقي ...
اتحطيت فى عربيه اللى فيها بيعرفوا يسوقوا ..
ويستحقوا يبقي معاهم رخصه ..
ولا مش بيعرفوا و هيلبسوك فى الحيط ...
هيطلعوك على طريق صح ..
ولا هيتوهوك ..
هيصلحوا طريقك ولا هيبوظوه و يبوظوك انت شخصيا
وتبقي محتاج عمره زى العربيه
كل واحد و نصيبه و اللى مكتوب على الجبين لازم تشوفوا العين
اه و النعمه يا اختشي

المهم ان ربنا يكرمك و تسيب العربيه الغريبه دى
و تكبر كده و تبقي شاب زى الفل
رخصته فى ايده ..
وتدور على عربيه ولا حتى توك توك تسوقه
المهم انك انت اللى هتسوق و انت اللى تختار طريقك
وبرده انت وحظك ..
ممكن متلاقيش لا عربيه ولا توك توك ولا حتى سكوتر

بس ساعتها مينفعش تياس و ترجع للعربيه الاولانيه
و تقول اللى نعرفه احسن من اللى منعرفوش
وهو انا كنت لقيت حاجه و قلت ولا ...
مش مهم تلاقى حاجه تسوقها ....
شوف انت عايز تروح فين ...
واتشعبط فى اى اتوبيس ...
او حنطور ... بس اوعى حد سخيف يشوفك و يقول للسواق كرباج ورا يا اسطى ..
المهم انك توصل للمكان اللى انت عايزه ...
اللى انت اختارته ... مش مهم وصلت ازاى ..
وطبعا مش وصلت هناك .. يبقي خلاص خلصت الحكايه و تقعد ..
ساعتها ممكن تلاقي التوك توك بتاعك ...

و تسوق انت ...
تختار طريقك اللى هتمشي فيه ...
بس الطريق ده انت مش بتمشي فيه لوحدك ...
و مش هتقول خلاص الدنيا بقت بمبى على راى الست سعاد ..
لا معاك ناس كتير سايقين فيه ...
فيهم كتير مش بيعرفوا يسوقوا ولا بيعرفوا يعملوا اى حاجه اصلا
وهتلاقيهم بيزنقوا عليك ... و يكسروا فجاه عليك ..
و بيعملوا اى حاجه عشان تلبس فى الحيط .,. او تطلع على الرصيف و تركن على جنب
اى حاجه ... المهم انك كتكملش طريقك
بس انت و شطارتك بقي و حرفنتك فى السواقه ..
هتعرف تاخد غرز و تهرب منهم ...
ولا هتتزنق و تقع ومتعرفش توصل

and that is the question

اللى هو هو بتاع الرفيقه الدادا ام عطيات
لا قصدى السؤال بتاع الرفيق هاملت

اغضـب.. اغضـب كمـا تشـاء ....



اغضـب.. اغضـب كمـا تشـاء واجـرح أحاسيسـي كمـا تـشـاء
حطـم أوانـي الزهـر و المرايـا هـدد بـحـب امــرأة سـوايـا
فـكـل مــا تفعـلـه ســـواء وكــل مــا تقـولـه ســواء
فأنت كالأطفال.. يا حبيبي.. يا حبيبي نحبهـم مهـمـا لـنـا أســاءوا
مــهــمـــا لـــنــــاأســـــاءوا.. نـحـبــهــم
اغـضـب.. فـأنــت رائـــع حـقــاً مــتــى تــثــور
اغـضـب.. فـلـولا الـمــوج مـــا تـكـونـت بــحــور
اغـضـب.. كـــن عـاصـفـاً كــــــن مــمــطـــراً
فـــــــإن قــلــبـــي دائـــمـــا غـــفــــور
اغضب فلن أجيب بالتحدي لن أجيب
فـأنــت طـفــل عــابــث يــمــلــؤه الـــغـــرور
وكـيــف مـــن صـغـارهـا تـنـتــقــم الــطــيــور
اذهب.. اذهب إذا يوماً مللت منـي و اتـهـم الأقــدار و اتهمـنـي
أمــا أنــا فـإنـي سأكـتـفـي بـدمـعـتــي و حــزنـــي
فـالـصـمــت كـبــريــاء و الــحـــزن كـبــريــاء
اذهــب إذا أتعـبـك الـبـقـاء
فـالأرض فيهـا العطـر والنسـاء والأعيـن الخضـراء و السـوداء
وعنـدمـا تـريـد أن تـرانــي
و عندما تحتاج كالطفل إلى حنانـي فعـد إلـى قلبـي مـتـى تـشـاء
فأنـت فــي حيـاتـي الـهـواء و أنـت عنـدي الأرض و السمـاء
اغضـب.. اغضـب كمـا تشـاء
اذهـب.. اذهـب مـتـى تـشـاء لا بــد أن تـعـود ذات يـــوم
وقـد عرفـت .. ماهـو الـوفـاء





ايوه اغضب ... اغضب و ثور و اعمل كل اللى انت عايزه
مش ضعف ... ولا استكانه ... و لا انا الست امينه و انت سى السيد
مش هسكت خوف ولا ضعف ..
ولا انت بتغضب و تثور ... ظلم و جبروت و تحكم ...
بس انت طفل ... طفلى انا ... ابنى ...
اللى فاهماه اكتر من نفسه ...
شايفه اللى مش شايفه فى نفسه ... و شايفه ابعد من اللى شايفه فى لحظه غضبك ...
و عارفه ايه ورا الغضب ... و ايه اللى فى قلبك ..
عارفه ان فى قلبك حب بجنون ... و برائه و خير .. زى برائه طفل لسه مولود
الناس شايفاك ثاير و غاضب ... وانا شايفه انك متعصب و مش حاسس بنفسك ..
بتعمل و تقول و تهدد ... وانت احن من انك تنفذ حاجه منهم و انا عارفه ده ...
بتستفذنى عشان اقف قصادك و نتخانق ...
بس مش هديلك الفرصه دى ... همتص غضبك و احتويك و احتوى غضبك ...
ما انت ابنى قبل ما تكون حبيبي ... و حبيبي قبل ما اتكون ابنى ..
وبحبك بكل حالاتك ...
حتى و انت فى غضبك ... بعشقك مش بحبك بس ...
لكن يوم ما الحب اللى جواك ليا يروح ...
يبقي مش عايزاك جنبي ...
حتى لو كنت فى منتهى الهدوء .... ومش بتغضب و مش بتثور ...
اللى جوا قلبك هو اللى يهمنى ...

امتصاصى لغضبك ... ده قمه قوتى ...
اللى بيبان للناس ضعف و استكانه ... ده ذكائى اللى مش ممكن يفهموا غيرى ...
فاغضب ..
و برده هفضل احبك

Sulto's Story ... With Nanoz Twist 2 !!

نيفين : حبيبي

عمر : نعم يا حبيبتى

نيفين : عايزه اسالك سؤال ؟

عمر : ومن امتى بتدى مقدمات عشان تسالى على اى حاجه ؟
اسالى عن كل اللى انتى عايزاه يا حياتى

نيفين : هو انت بتحبنى ليه ؟!

عمر : بحبك ليه ؟!
ايه لزوم السؤال ده دلوقتى

نيفين : اصل شفت لبنى امبارح و حكتلى على خروجتها مع هانى خطيبها
و قالتلى انه قالها هو ليه بيحبها
فانا فكرت انت ليه بتحبنى
معرفتش
فعشان كده بسالك

عمر : غريبه !

نيفين : هو ايه اللى غريبه ؟
و بتهرب ليه من السؤال
هو صعب قوى كده مش لاقى اجابه

عمر : مش بهرب ولا حاجه
انا بس بس بجد مستغرب
اصل انا عمرى ما فكرت انا بحبك ليه

نيفين : طب احنا فيها
فكر و قول لى

عمر : انا ممكن اقولك انى بحبك عشان فيكى كل اللى كنت بحلم بيه
وانسب واحده فى الدنيا ليا
وفيكى كل المواصفات اللى كنت عايزها
و مبسوط و برتاح معاكى ... وانتى بتعملى اكتر من اللى انا بحتاجه
و فيكى صفات احسن من اى واحده قابلتها او هقابلها فى حياتى
ولو فضلت الف طول حياتى مش هلاقى زيك
بس مش ده السبب


نيفين : يا سلام
هو انا مش الحاجات دى كلها يعنى !

عمر : يا حبيبتى انتى ده و اكتر من كده كمان
بس حتى لو كنتى مش مناسبه ليا
ومش فيكى الصفات اللى بحلم بيها و عايزها
ولو تعبانى و مطلعه عينى و فيكى كل الصفات اللى مش بحبها
برده كنت هحبك انتى و مش هشوف غيرك

انا بحبك ... زى ما انتى .. بحب كل حاجه فيكى
بحب جنانك .. و بعشق تفاصيلك
مش بحبك لسبب
السبب الوحيد اللى مخلينى بحبك
انى مقدرش محبكيش
مقدرش استغنى عنك
لو عمر محبش نيفين مش هيبقي عمر
عشان انتى حته منى و ساكنانى

نيفين : انا بحبك قوى بجد

عمر : وانا بموت فيكى يا قلبي
ربنا ميحرمنيش منك
عشان انا مليش غيرك

Sulto's Story ... With Nanoz Twist !!

هى : انا خلاص تعبت .. مش قادره

صاحبتها : انتى اللى عامله فى نفسك كده

هى : انا ! .. هو فى حد بيتعب نفسه بمزاجه

صاحبتها : ايوه فى ... انتى
انتى اللى معذبه نفسك و معذباه معاكى
بتحبيه و بتموتى فيه و كل ما تلاقى الكلام قرب من الجد بتهربى

هى : غصب عنى
بجد غصب عنى .. اصل مينفعش

صاحبتها : هو ايه اللى مينفعش

هى : مينفعش يقولى بحبك
مينفعش انا كمان اقولها له

صاحبتها : بس انتى بتحبيه بجد

هى : ماهو عشان بحبه بجد .. مينفعش
مش هستحمل يقوللى بحبك
و ندخل فى حكايه ... و ابقي مجرد حكايه
ابقي زى اى واحده

صاحبتها : و انتى ليه افترضتى انك هتبقي مجرد حكايه

هى : وليه مبقاش ؟

صاحبتها : بس الموضوع يستحق المحاوله
مش كل ما يحاول يفتحه .. تهربى انتى و تقفليه

هى : مش هستحمل ان يبقي فيه محاوله و فشل
مش هستحمل علاقتنا تبوظ
عندى نفضل كده طول العمر و لا نجرب و نفشل و نبعد عن بعض
انا لو بعدت عنه هاموت ... بجد هاموت

صاحبتها : طب و بعدين

هى : هستمر فى نفس اللعبه
كل ما يجى يفتح الموضوع ههرب و ابعد
طول ما هو بيقدر ميقولش
انا مش عايزه اسمعه
لكن هسمعه بس اما يبقي خلاص مينفعش ميقولش
مهما كان رد فعلى

صاحبتها : بس انتى كده بتموتى الحب جواه
الحب محتاج رعايه من الطرفين عشان يكبر و يبقي اقوى

هى : لو ينفع يموت ... يبقي يموت دلوقتى احسن
لكن لو فى حاجه حقيقيه و بجد
هيعيش حتى فى الظروف دى
وده اللى انا عايزاه ... عايزه اما نرتبط يبقي اللى بيننا حقيقي
مش مجرد تجربه ... عاجبين بعض و هنشوف اذا ننفع او لا

صاحبتها : و انتى هتقدرى على اللى بتقوليه ده

هى : ساعات ببقي خلاص بموت
قلبى بيبقي بيتخنق .. ببقي عايزه اقول مش لاعب
و اهرب على قد ما اقدر و ابعد عنه
بس مبقدرش ابعد عنه
انا مش بفكر فى غيره من ساعه ما بصحى لحد ما بنام
حتى و انا نايمه بفكر فيه
حبه بجد ملكنى .. و ملك كل حاجه فيا
بس يا يبقي ليا صح ... يا مش عايزاه
وكفايه ابقي موجوده جنبه .. فى حياته .. ده كفايه عليا


صاحبتها : انتى مجنونه

هى : مجنونه بيه

You

i can't stop
i won't stop
im not doing anything wrong
the only one that is hurting is me
and as long as it's just inside me
im not gonna try to get rid of it anymore
cuz i've tried that .. and it didn't do me any good
im just gonna accept the facts
the fact that u r my everything
and im ur nothing
the fact that this is not meant to be
the fact that .. wat's inside me became bigger than me
bigger than life itself

i love u like no one have ever loved before
im yours ... even if u never found out
im runnin away ...
sometimes .. im runnin to u
and sometimes from u
but all the times i can't stay away


yes im very emotional person
i can't control my feelings
i can't tell my heart wat to do
but this is only inside me
my actions are controlled by my mind
so
now im lost
i don't know wat to do
stay close
or just walk away
i can't do either of these choices
they are both beyond my ability

so forgive me
sometimes i can be very cold to u
but this is just a cover
cuz i have to look cold
to keep myself from huggin u
and never let u go
but this can't be
cuz u r not mine

i know u r just fiction
a thought in my head
but u r real to me
and that's enough

تخاريــف

لما الدنيا تقفل قدام عنيك
افتح عنيك اكتر
و لو ضلمت و شفت سواد بس
ركز اكتر
عشان فى عز الضلمه هتلاقى نور
يمكن انا من نوع سخيف يعز النكد قد عنيه
ويعيش فى قصص و حوارات و يخنق بيها على نفسه

بس فى كل ازمه و مشكله
بيبقي فيه جزء مليان فى الكبايه
مش دايما نص
بس بيبقي فيه حاجه كويسه

فى الازمه بتعرف حاجات كتير
و بتفهم اللى حواليك اكتر
بتعرف مين صادق و مين مدعى
و بتعرف برده ان فيه علاقات اقوى و اسمى من اى خلاف عبيط
وقت الجد بيتنسي اى حاجه تانيه

الاخ حاجه كبيره اوى
مش مجرد كلمه فى شهاده ميلاد او بطاقه تموين
بس حياه و حب و امان
امان انك مهما حصل لك فى الدنيا
مش هتبقي لوحدك
و لو اى حد اتخلى عنك ... فى حد بينكم دم و عشره و سنين
ممكن يفديك بروحه


فى حاجات كتيره حلوه اوى فى الدنيا
طول الوقت بفكر
دماغى مش بتقف ... لحد ما هتضرب .. او خلاص ضربت
بس الدماغ دى ساعات تمشى فى سكك مضلمه و ساعات تمشي فى سكك منوره
و احنا اللى بنختار نشوف ايه و نمشي فين

مش عارفه معنى اللى كتبته
بس الحق مش عليا
انا كنت نايمه فى امان الله و صحيت على كابوس
خنقنى و كأبنى ... و فكرنى بحاجات حلوه حصلت

وطلع حتى الكابوس فيه خير

Fairy Tale

بدات زى الناس كلها ما بتبدا ..

اتولدت .. بكيت و بعدها اتعلمت اضحك..

و اتعلمت الكلام .. سمعت حكايات و اساطير..

حلمت .. حلمت اعيش حكايه حقيقيه مش خياليه ..

حكايتى انا...

حكايه من غير نهايه .. حكايه فيها حزن و سعاده .. فشل و نجاح ..

اطير على بساط علاء الدين و الف الدنيا

ابقي سيندريلا و الاقى الامير

ابقي روبن هوود و اساعد الناس من غير موضوع السرقه

اكون انا ... اعرف مين انا ...

اتأثر بالناس ... و اؤثر فيهم ...

احب .. و اتحب ...

اعيش ..

خيال .. حقيقه ... مش مهم

المهم تعيش و تطلع من الغيبوبه

انت عايش ؟؟؟

نـقـطـــه و مــن اولـ الـسـطــــر

فتحت صفحه موضوع جديد ... و فضلت فتحاها .. بس معرفتش اكتب حاجه ..


فقررت اقفلها .. و امسك ورقه و قلم .. و اكتب .. مش عارفه اكتب ايه ؟؟!
بس كنت عايزه اكتب ..
يــاااااه .. بقالى كتير ممسكتش ورقه و قلم و كتبت عربى !! ..
او بمعنى اصح اى حاجه غير المعادلات و العك بتاع الكليه ..


فتحت صفحه جديده و حطيت اول خط ... كتبت بالرصاص عشان اقدر امسح ..
بس المشكله ان حياتنا كمان صفحات جديده .. بس مش بينفع يتكتب فيها بالرصاص ..
اللى بنكتبه فى كل صفحه بيبقي جزء مننا .. من حاضرنا انهارده .. و جزء من ماضينا بكره ..
جزء مش بيرجع تانى ..
بس من رحمه ربنا بينا .. ان كل يوم صفحه جديده .. كل لحظه بتعدى علينا .. كل نفس بنتنفسه ..
كمان لحظه جديده .. احنا اللى بنقرر نكتب فيها ايه ...

صفحه امبارح كتبت فيها حاجات وحشه كتير ... صفحات فيها اسود كتير !!! ...
غلط .. قصرت .. كابرت .. مفيش استيكه امسح بيها اللى كتبته ...
بس مش مهم ... ايوه مش مهم ..
لو مكنتش كتبت الحاجات دى .. مكنتش اتعلمت اكتب كويس .. مكنتش فهمت ..
الصفحه خلاص اتكتبت و اتقلبت ... و استفدت منها .. و مش هكررها تانى ..
يا رب .. يارب سامحنى عليها .. لانى فعلا اتعملت .. و مش هعمل كده تانى !! ..


صفحه انهارده !!! .... انهارده يوم جديد .. صفحه جديده ..
عايزه اكون انسان جديد ... عايزه اكتب جواب شكر لكل اللى ساعدونى .. رساله حب لاهلى و اصحابى ..
عايزه اسامح كل اللى اذونى ... مش عايزه يبقي جوايا مراره تانى ...
كل المراره اللى جوايا عايزه اتخلص منها انهارده .. مزعلش من حد .. او اتضايق من حد عنده نعمه مش مقدرها و انا محتاجاها ..
عايزه اشكر ربنا ... و احمده على النعم الكتير اللى انعم علينا بيها ..
احمده عشان كل امرنا خير .. فرحنا خير .. و زعلنا خير .. حتى لو احنا مفهمناش ... بس فيه خير فى كل حاجه بتحصل ..
عايزه اقول اللهم عافنا مما ابتليت به غيرنا ... و اعفى غيرى مما ابتليتنى به ..
و اطلب ان ربنا يرحمنى و يهدينى و يوفقنى ... و يرحمنا و يهدينا و يفوقنا كلنا ...

بس ... انا خايفه .. خايفه من صفحه بكره .. خايفه تبقي زى صفحات الماضى ..
خايفه تبقي اسوء .. خايفه من نفسي اكتر ما انا خايفه من بكره ...
خايفه مقدرش الاقيها .. خايفه قوى ..
بس مش ههرب .. و مش عايزه استسلم .. هواجه بكره .. هواجه و انا معايا الحاجه الوحيده اللى ممكن تساعدنى ...
ايمانى بربنا ... ايمانى انى مش هاخد اقل او اكتر من نصيبى .. ايمانى برحمه ربنا هيدينى القوه ...
حتى لما افقد ايمانى فى نفسي و الدنيا و الناس ...

عايزه املا الصفحات حب و حياه .. تجارب ...
تجارب فيها فشل و نجاح ..
افتكر الصفحات اللى فاتت .. اتعلم منها و ارميها ورايا ..
و افكر فى صفحه انهارده و بس ..
و اسيب صفحه بكره .. اما يجي بكره ..

و احط نقطه ... و من اول السطر !!!