GoodBye

فاضل دقايق و السنه تخلص
مش زعلانه خالص انها بتخلص ...
يمكن السنه دى اكتر سنه كان فيها وداع
يمكن فارقت فيها اكتر من اى سنه تانيه ...
يمكن عشان فارقت فيها حياه كامله .. مكنتش اعرف غيرها اللى فات من عمرى
فارقت حياه الدراسه .. الكليه و المذاكره و الامتحانات و الدروس .. و زمايلى و الدكاتره
النزول و الزحمه و الارهاق و القلق .. حياه كامله ..

ولسه مبداتش حياه تانيه غيرها
وانا مش متعوده على الفراغ .. بيدى وقت لدماغى تشتغل و دى حاجه مش كويسه نهائى
الغريب فى 2008 .. ان العادى فى اى سنه بيبقي فيه حاجات حلوه و حاجات وحشه
بس السنه دى كانت الحاجات الحلوه الدنيا بتديهالى من تحت الضرس
ولازم تحط حاجه سخيفه .. عشان متفرحش اوى
فالحاجات اللى تفرح كان بيحصل فى ساعتها حاجه تانيه تضيعها
happily ever after حتى ينتصر الشر و ميبقاش فيه

و مؤخرا عرفت معنى ان الدنيا تتعامل بمبدأ هو كله ضرب ضرب مفيش شتيمه

اتعلمت حاجات كتييييييييييير اوى السنه دى
عرفت حاجات اكتر
و عرفت نفسي اكتر و اكتر

يمكن اتغيرت ... جايز .. مش عارفه
السنه دى تميت 21 .. بس جوايا عايزه افضل 15 على طول
و يمكن القانون بيعاملنى على انى راشد دلوقتى ... بس ولا يهمنى
هيفضل معايا شهاده معامله الاطفال على طول
دى الحاجه اللى لما كل حاجه بتتكسر او بتتغير بحاول احافظ عليها باى طريقه
طفولتى و جنونى ..
ناس كتير اولهم ماما .. نفسهم اغير الحاجتين دول .. بس لا يمكن


اكتشفت انى مختلفه (H)
كل اللى عادى و طبيعى عند الناس .. مبيديش معايا نتيجه ولا بعرف اعمله
اكتشفت انى بتتبع نظريه الفرخه الدايخه
اما تحصل حاجه .. واما الفرخه تتدبح بتقع .. و انا كمان بقع فى ساعتها
بس بعدها بقوم ... زى ما الفرخه بتفضل تقاوح و تخبط
وتفتكر انها كويسه و متدبحتش ولا حاجه
هو فيه اه حاجه بتوجع .. بس اكيد تهيؤات .. ازاى تبقي مدبوحه و هى لسه بتتحرك
اكيد ده جرح صغير هيخف لوحده ... مش لازم تكبر الموضوع .. دى حاجه و بتعدى
الالم هيروح لوحده .. لازم يروح .. اكيد هيروح
بس الفرخه بتبطل حركه ... دمها اتصفى .. و روحها طلعت .. و الجرح مطلعش صغير
وانت كمان .. انت كمان مبقتش قادر تتحرك .. مبقاش عندك القدره تقنع نفسك و اللى حواليك انك كويس .. معندكش قوه تضحك بها على نفسك .. القوه اللى عندك خلصت .. زى ما الدم اتصفى
و بتقع .. بتقع وقوع صعب تقوم بعده .. بيبقي الالم حياتك و النفس اللى بتتنفسه
جسمك مش بيتحمل و بتقع .. و تتحول حياتك لدكاتره و تحاليل و ادويه
وتفتح مينى صيدليه عندك من كتر انواع الادويه .. عشان كل دكتور جديد بيكتب ادويه جديده
بس اللى عندك مش عضوى ... و علاجه مش الادويه ... السبب اللى جواك
انت السبب ... نفسيتك تعبت جسمك ... وبدل الم واحد بقوا اتنين
الاونا ... الادوى ... الاترى .. مين يزود
و فجاه تلاقى نفسك غريب عن نفسك ... نفسك اللى عشت معاها عمرك كله مش لاقيها
فيه حد جديد .. متعرفوش ... مش فاهمه .. مش عارف تتعامل بيه
بتهرب و تحاول تفهم انت .. قبل ما تتعامل بيه مع الناس و ميفهموش حاجه و انت معندكش ردود على اسالتهم بتاخد ركن بعيد عن الناس .. مش عايش حياه بعيد سعيد .. انت ببساطه مش عايش اصلا
و تفهم محمد نور يقصد ايه بـ و مين عايش حبيبتى دى هي ايامى بقضيها
و تبقي بس ايام بتتقضى .. ثانيه ورا ثانيه لحد ما يخلص اليوم و اللى بعده و اللى بعده
لحد ما يجي يوم ... و تيجي ثانيه بعد شهور كتيييييير ... تكتشف ان مفيش حاجه هتتغير
انك مش هتفهم اى حاجه ... وان الالم مش هيقل .. مفيش حاجه ممكن تضيعه
انه بقي جزء منك ... و هتتعامل بيه مع اللى حواليك .. عشان لا هو هيروح و لا انت هتهرب طول عمرك
you just have to deal anyway possible
suck it up ... and live with it



اكتشفت كمان انى معرفش ابقي رد فعل ... مبعرفش اكون غير فعل .. معرفش اكون غير نفسي
على قد ما تحاول تكره .... مبتعرفش ..
على قد ما تحاول تغضب ... تزعل ... متهتمش على اقل تقدير
برده مبتعرفش ... و تكتشف انك بكل بساطه سامحت .. سامحت من قبل ما تعمل اى حاجه تانيه
بتلاقى نفسك بتعمل اللى طبيعتك بتقولك اعمله حتى لو كل اللى حواليك قالوا لا
قالوا ده غلط ... مينفعش ..

و بيقولوا اللى باعك بيعه ... و اللى كرهك اكرهه
واللى جرحك اجرحه ... او على الاقل انساه
واللى انت متفرقش معاه .. المفروض ميفرقش معاك
بس القوانين الرياضيه دى برده مش بتنفع معايا ... عشان للاسف انا مش رد فعل


و بيقولوا برده لو جرحوك اوعى تسيبهم يشوفوا ضعفك عشان كده بتديهم اللى عايزينه
بس ليه تشغل بالك .. وتعمل مجهود
وانت مين اصلا عشان تحرم حد تعب و عمل مجهود .. من انه يشوف نتيجه تعبه و يفرح بانتصاره
لازم يفرح .. ده حتى انت كده بتكسب ثواب انك بتخلى انسان يفرح



حاجه غريبه اما حياتك تبقي عامله زى حلقه مفرغه
الاحداث هى هى .. بتتكرر
شخصيات مختلفه .. بنفس الطريقه و نفس الاحداث
ناس متعرفش بعضها ... انت بس العامل المشترك بينهم
و تلاقيهم بيعملوا معاك نفس التصرفات ... و نفس الاحداث ... و نفس النهايه
كلهم بيقولوا نفس الكلام ... و بعدين تحصل نفس المشاكل .. و تنتهى نفس النهايه
و الاعجب من كده ... اما تلاقى نسخ مكرره من ناس فى حياتك .. موجوده فى ناس تانيين
على اساس ان نسخه واحده مش كفايه عليك... محتاج اكتر من واحده


صديقي العزيز .. الرجل الاخضر قرر يختلف و هو بيتكلم عن 2008
و نزل بوست شكر ... هو اه كان شكر لعمر طاهر يتخلله ناس تانيه
بس انا هسيبله عمر طاهر و مش هدخل بينهم
و هتكلم عن ناس فى حياتى فى نهايه 2008

كل الرسايل كتبتها بدون اسماء
وكتبتهم بصيغه المذكر لان المذكر بيشمل النوعين

**************
يمكن اكون طول الوقت مش مبينه تقديري لك
بس انا فعلا مقدره وجودك فى حياتى ... مقدره كل حاجه حلوه بتعملها عشانى
و كل المحاولات لمساعدتى .. هى اه كلها بتفشل .. بس مجرد المحاوله كفايه
بجد بكره نفسي كتير معاك .. و بكره الطريقه اللى بتعامل بها
عشان انت تستحق احسن من كده ... احسن من كده بكتير
بس انت اكتر حد بيقدر يستحملنى فى الدنيا
واكتر حد بيقدر يستفذنى برده .. فانا بجد اسفه على كل حاجه وحشه طلعت منى
و بجد متشكره لاقصى درجه لكل حاجه بتعملها عشانى
حاجات انا مستحقهاش ... بس ده مش بيمنعك تديهالى

**************

صعب ان حد يبقي منك ... حته منك ..
وانت منى ... السنين و العشره و الصداقه و الحب و كل اللى بيجمعنا
بقي اكبر من اى مسمى ...
انا عن نفسي بعتبرك اهلى ... اهلى اللى لو اتخانقنا .. زعقنا .. جرحنا حتى بعض
مهما حاولت تهرب منهم ... فهم فى دمك ... جواك .. و منك
بترجع لهم ... مش غصب عنك ... بس عشان الحب اللى بينكوا اكبر من اى مشاكل
و اكبر من اى جرح ... وانت اهلى .. ومنى ... و مستحيل اقدر ابعد عنك
عشان رغم كل شىء .. هفضل طول عمرى احبك
و هفضل مسئوله عنك ... و نتخانق على كل حاجه ... و نبهدل بعض و نفرج علينا الدنيا
بس فى الاول و فى الاخر ملناش غير بعض
و الدنيا بتلف بينا و بنقابل و بنفارق ... و احنا سوا
ربنا ميحرمنيش منك
بحبك


***************

معرفتك كانت احلى حاجه فى 2008
صحيح مكانش فيه منافسه قويه ... عشان مفيش حاجات حلوه كتير حصلت السنه دى
بس برده ... معرفتك كانت احلى حاجه حصلت لى الفتره اللى فاتت
وجودك جنبي هون عليا كتييييييييييير
و وقوفك جنبي مش ممكن انساه
و انك مهربتش اصلا من معرفتى ده لوحده .. جميل لن انساه
عشان عرفنا بعض فى وقت انا اصلا مكنتش كويسه فيه .. و بطلع من مشكله للتانيه و من تعب لتعب
و انت جنبي ... بدون كلل و لا ملل زى ما بيقولوا
يمكن عشان احنا الاتنين شبه بعض زياده عن اللزوم ... حتى فى الامراض
احنا الاتنين فقريين ... و لساننا جايبنا ورا
بس بجد بجد انا بحبك اووووووووى ... وربنا ميحرمنيش منك ابدا

****************

تبديل الاسماء مكنش صدفه
ده كان الصح
يمكن الصح الوحيد

**************

فراقك السنه دى كان صعب عليا اوى
فكره عدم وجودك فى حياتى - رغم كل الوقت اللى عدى - فوق مستوى استيعابى
عشان اللى بيننا كان كبير اوى
و اللى عدينا عليه سوا مكنش برده قليل
كنا مع بعض كتير اوى .... و اتفقنا نبقي مع بعض طول العمر
ولو كل الناس سابونا مش ممكن احنا نسيب بعض
بيننا عشره و عيش و ملح .. و ايام حلوه و ايام صعبه
بيننا كتير اوى ... لا يمكن انساه
مش ممكن اللى جوايا ناحيتك يبقي اى حاجه غير كل حب و كل حاجه نضيفه
بس فراقك بيوجع اوى
مش قادره اصدق ان عدى اكتر من 9 شهور مشفناش فيهم بعض
بس مكانك هيفضل فى قلبى و فى حياتى ... مش ممكن اقدر انسى مهما حصل

****************

صدفه غريبه و لفه اغرب رجعتك حياتى
غريبه بجد الدنيا .. لفه طويله اوى .. رجعتك حياتى من تانى
مش عارفه لو شفتك فعلا هعمل ايه
كنت فاكره انى نسيت
بس مجرد اسمك رجعلى ذكريات و حاجات كتير اوى
مش عارفه اذا كنت هقدر او لا
بس التجربه هى اللى هتبين


***************

ازاى حد يبقي تايه للدرجه دى
ازاى حد يبقي تايه لدرجه ان هو نفسه مش عارف الحقيقه
مش عارف عايز ايه .. رايح فين .. او هيعمل ايه
واللى صح الثانيه دى ... غلط الثانيه اللى بعدها .. و صح تانى فى اللى بعدها
ازاى حد يفضل فى متاهه
كل شويه يفتكر انه لقى باب الخروج
ويرجع يلاقيه سراب
و يلاقى نفسه لسه جوا المتاهه
يارب يلاقى باب الخروج ... و اللى هيلاقيه اول ما يلاقى نفسه مش اى حد تانى
اول ما يتعرف على نفسه ... و يحدد حياته و يخرج بره المتاهه
يا رب يقدر يعمل ده



***************

بجد كل يوم بيعدى عليا بيبقي نفسي تبقي معايا .. تشيل عنى ... تشيلنى انا شخصيا
يمكن انا طول الوقت بقول انى محتاجاك جنبي
و وجودك كان هيخفف عنى كتير اوى
بدعيلك من قلبى الله يرحمك
و برتاح انك فى مكان احسن ... بعيد عن اى تعب و اى عذاب
فى الجنه بعيد ... عشان روحت وانت طفل نضيف
وبدعى كمان اما يجى يوم اللقا .. ابقي انا كمان نضيفه من غير ذنوب ولا خطايا
عشان كده

لو غلط فى اى حد ... انا اسفه بجد
ياريت يسامحنى و يغفرلى

و ياريت اى حد شايل اى حاجه من حد برده يسامحه و يغفرله
و يحط نفسه مكانه ... و زى ما نفسه الناس تسامحه .. هو يسامح غيره
عشان نبدا سنه جديده ... نضاف .. مش غير ما نشيل حاجه وحشه من حد
ولا حد يبقي شايل مننا

2008

كل اما اشوف حد بيتكلم عن 2008 بينحصر الكلام بين انها سنه وحشه
و انها اسوء سنه عدت فى حياته
بالنسبه لى انا .. انا مع الناس اللى بتقول انها اسوء سنه عدت
و نحمد ربنا انها عدت

ولو ان فى ملحوظه سخيفه جدا جدا
ان من اول ما بدات 2000
وكل سنه اسوء من اللى قبلها ... و الحال بيتدهور
شخصيا و محليا و دوليا و عالميا و كل حاجه
ببساطه بتتنقل من سىء لاسوء

الاغرب بقي ان السنه دى ... النصف التانى فيها عباره عن سلسله مصايب
اللى هو قبل ما تلحق تفوق من واحده تلاقى التانيه مجانا
و مش محتاجه اقول ايه المصايب .. عشان كلنا نفسنا ننسى و مش عارفين
بس كل مشكله بجد اكبر من اللى قبلها ... و كل يوم اسود من اللى قبله
و كان ختام رائع لسنه اروع اللى بيحصل فى غزه دلوقتى
و الاتجاه العام ان حد واحد او حاجه واحده خارقه للعاده ... و كل حاجه تحصل فى الكون مسئوليتها لوحدها .. ومش مسئوليه اى حد تانى ... كل واحد ممكن يشيل ايده من كل حاجه و يحط رجل على رجل و يوزع مسئوليات و اتهامات و مش مهم يشترى مرايه من على اى رصيف و يحاول يبص فيها الاول
لا الاسهل ان كل واحد يرمى المسئوليه على غيره و يا سلام بقي لو كله استسهل و كله اتفق يرمى المسئوليه على نفس الشخص ... بيتحول فى ثانيه الاتهام لحقيقه ثابته .... و الناس كلها مجمعه عليها .. مينفعش تقاوح و تقول لا

كل يوم اسوء من اللى قبله ... عشان كل يوم الناس اغبى من اللى قبله
كل يوم بيموت فيهم حاجات مينفعش تموت ... و بيتولد فيهم حاجات مينفعش تعيش
كل يوم بيموت فيهم انسانيتهم و كرامتهم و الشهامه و النخوه
و بيتولد الخوف و السلبيه و قدره تحمل رهيبه للبهدله بدون ما يتكلموا
خوفا من كل حاجه .. خوف لا يروحوا ورا الشمس ... خوف لا يتبهدلوا اكتر .. و اهى بهدله صغيره و تعدى
او سلبيه ... وانا مالى .. مش انا اللى بيحصل فيا كده .. مش اهلى اللى بيتعمل فيهم كده
انا مليش دعوه
ده غير طبعا استباحه حاجات كتير اوى مينفعش تستباح
بقى عادى رمى محصنات ... بقي عادى يتجاب فى سيره الناس و الاموات
بقي عادى ان كل واحد عنده عقده نقص يدور على واحد اضعف منه يتنطط عليه
عادى تدور على عيوب كل اللى حواليك و تجرحهم بيها ... تتكلم و تغتاب و تنم .. ومش فى السر
لا فى وش اللى قدامك و الناس كلها تبقي متنمرين ... زى ما بيترجموها فى التلفزيون
بقي عادى التعامل بمبدا الغابه ... ده حاول يجرحنى يبقي من حقى اقتله
والاقوى اللى يدمر التانى اكتر
عادى ان العشره و العيش و الملح ميبقاش لهم اى اهميه .. و يتنسوا فى لحظه
عادى جدا ان واحد يدوس على اخوه عشان فلوس اكتر ... شغل احسن ... اى حاجه
صحيح اول جريمه فى التاريخ كانت اخ بيقتل اخوه
بس دلوقتى الناس مش بيتهز فيها حاجه اما تقرا على جريمه كده
بقي عادى ... ممكن يتهزوا اكتر اما يعرفوا ان سعر البتنجان زاد
زادت القسوه و بقت حاجه عاديه


بقي العادى ان الناس تستغرب من وجود شخص شهم ... امين ... مخلص
و مفيش اى اندهاش من شخص ندل .. حرامى .. خاين
عشان ده العادى

يا ترى بكره ممكن فعلا يبقي احسن ...
بس هيبقي احسن ازاى
اللى هو باماره ايه
هيبقى احسن ليه و احنا اصلا اسوء

Between a rock and a hard place

it sucks being between a rock and a hard place

it's not fair to ask u to choose
but it's also not fair to be in my shoes

i can't accept things as it is
i can't accept this situation

and there's absolutely nothing to do
u can't make a choice
u can't walk away
and i can't ask u to do so
it's not fair ... and it's not right

but life is not fair
and i don't know how am i supposed to deal with this
how can i ignore the betrayal im feeling
i know i shouldn't feel it
but it is wat it is
and i can't help but feel betrayed

my hands are tied
the only thing i can do ... is walking away
i can't make u choose .... but i can
i can choose not to be in this place
choose not to watch you .... without being able to say anything
or even object

but guess wat

i can't walk away either
i can't leave ... i can't leave u
i love u ... but surely i don't like you right now
and i can't tell u that
it's not a right time
and i have to be a good girl
a good understanding girl who knows that it's not fair to u

but wat about me

i really don't know wat do

it really sucks being between a rock and a hard place

Keep Breathing

The storm is coming but I don't mind
People are dying, I close my blinds

All that i know is I'm breathing now

I want to change the world...instead I sleep
I want to believe in more than you and me

But all that I know is I'm breathing
All i can do is keep breathing
All we can do is keep breathing now
now
now
now

All that I know is I'm breathing
All I can do is keep breathing
All we can do is keep breathing

All we can do is keep breathing




there is nothing that u can do but keep breathing
even breathing ... if u could switch it off
u won't wait a sec to rethink
u will just do it ... u will stop
but u just can't .. it's just not up to u

u have to keep breathing
keep existing .... not living ... just existing
cuz everything will let u down
it will start with people around u
then ur own body will let u down

with all the pain ... the sadness and sorrow
it won't be just ur psychological or emotional state that is down
it will also be physical
and ur own body will fail to carry u

but this is wrong .. cuz it ain't worth it
nothing is really
life goes on ... with or without u
and people will hurt u ... break u
and just won't care .... they will just keep moving
and they will walk all over u
actually they should be really proud of themselves
cuz they succeeded in doin wat so many have failed to do before
so they deserve a big round of applause

and all u can do is keep breathing
swallow ur pain .. expect nothing ..
work as hard as u can to keep moving

and keep it up

there's no magical glue for mending broken hearts

ممكن تخرج .. ممكن تتكلم .. ممكن حتى تضحك
بس برده قلبك هيفضل مكسور
ومع كل كلمه بتنطقها ... و كل ضحكه بتضحكها ... بتكسر قلبك اكتر
وتوجعك اكتر ... و يبقى السكوت احسن و اريح
عشان كل المحاولات بتفشل و بتكسرك اكتر
واما بتحاول تخرج من اللى انت فيه و تقف على رجلك
وانت اصلا مش عندك طاقه كفايه لده
فبتستهلك كل اللى عنك و ترجع تحت اكتر من الاول
واما تبقي مكسور و تقوم تقف .. الكسر بيبقي مضاعف و يفضل يتضاعف مع كل محاوله
فاحسن حل انك تبطل تحاول لحد ما جرحك يلم لوحده
بدل ما تدوس عليه و يفتح اكتر و يوجع اكتر و اكتر مع كل محاوله

فاحسن حل انك تاخد ركن لوحدك
عشان متضايقش حد .. و محدش يحاول يصلحك
عشان انت كل اللى عايزه ان بس الالم يقف
مش مهم تبقي كويس .. مش مهم تبقي سعيد
مش مهم تحس اى حاجه
المهم بس الالم يقف
بس مفيش دواء سحرى يصلح قلب مكسور و روح مجروحه
ونفس تاهت محدش لاقيها

ثقافه الواجب و الجميل

من ثقافات الشعب هنا .. هو الواجب و الجميل

لازم كل واحد يعمل الواجب .. عشان يرضي ضميره و يريح نفسيته
مش مهم اى حاجه تانيه
بس اهم حاجه الواجب

مش قادره استوعب ... ازاى 30 واحد يقفوا على باب رعايه مركزه و عايزين يدخلوا يشوفوا مريض
هو يعنى مريض فى رعايه مركزه هيبقي فى دماغه يستقبل كل الناس دى
ولو اتكلم مع كل واحد شويه .. و سلامتك و ازيك و ايه اللى حصل
والجيران و القرايب و المعارف و معارف المعارف
مش مهم اللى تعبان و مش مهم ان فى مرضى تانين فى الرعايه
المهم كل واحد يعمل الواجب .. و يتحرق اى حد تانى

حاجه تانيه بتحرق دمى فى موضوع الواجب و الجمايل دى
انا بكرهها و مش بتعامل بها .. ولا بعرف اتعامل بها على اساس انها عمله متبادله زى ما الناس بتعمل
فلان عمل لى كذا .. ابقي اعمل له كذا
وده له عندى واجب ... و ده عليه ليا واجب
ممكن اكون ناكره للجميل ... بس اللى بيتعامل معايا بمبدا الجميل كعمله متبادله
ولا بيفرق معايا فى اى حاجه ولا كانه عمل اى حاجه
و بكل صرحه اكتر ... مش عايزه منه حاجه ..
لان بكل بساطه الله الغنى .. عن جميل من اى حد

الحاجه الوحيده اللى افهمها و اقدرها و احط صاحبها فوق دماغى
انه يكون بيعمل الحاجه من قلبه ... ان حد يهتم بيا و يبقي من جواه عايز يبقي جنبي
حتى لو ظروفه مسمحتش يعمل اى حاجه ...
انه من قلبه مهتم .. بيخليه عندى اهم و احسن مليون مره من حد بيتعامل من بره قلبه بس عشان الواجب
لكن موضوع الواجب ده بيفقعنى و ينزل اللى قدامى من نظرى مش بيعليه

مش عارفه ... فى حاجات بسيطه اوى بتعلى اللى قدامى فى نظرى
وحاجات ابسط بتخلينى مش عارفه
حاسه فى ناس كتير مفتعله

يا رب

يا رب الرحمه من عندك

يا رب اشفيه و اعفوا عنه

يارب خفف عنه و اشفيه

يا رب الرحمه يا رب

بـنـت عــالــمــى

سميره عندها حاله ملل بتفقد فيها الامل
انا بقي عندى حاله قرف ...بفقد فيها الامل برده

حاسه الدنيا بقت مقرفه اوى ... الناس بتتعامل بوحاشه و وحشيه مع بعض
مش بس الناس الوحشه بتتعامل وحش
مبقاش فيه التقسيمه بتاعه زمان دى
اللى هو ناس كويسين تحس معاهم بامان
وناس وحشين تبعد عنهم و تخلى بالك منهم عشان هيأذوك
مبقاش فيه ابيض و اسود
الابيض اختفى من الاسواق فى ظروف غامضه

بقي فيه الرمادى ... و كل شويه درجته بتغمق و يقرب للاسود
الناس الكويسه بيأذوا ... و الوحشين بيأذوا
مبقاش فيه قاعده ثابته .. مفيش حد متاكد منه
كل الناس بلا استثناء فى يوم من الايام و لحظه من اللحظات هيأذوك
مش لانهم وحشين و اشرار ... بس عشان دى حال الدنيا
و مفيش استثناء .. حتى انت نفسك مش استثناء

انت كمان غلط ... انت ابن الدنيا اللى عايش فيها
وانا كمان .... انا بنت العالم ده
قرفانه منه اوى .... فكرت لقيتنى زيه
فيا نفس نفاقه و جبنه و قرفه
فيا اللى فى كل الناس ... انا كمان بجرح .. وانا كمان بيبقي جوايا حاجات لناس بتكلم عنها من وراهم
ومش بواجههم بها ... مش خوف ... بس يمكن تعب .. عشان مش قد مواجهه و عتاب
مش عارفه السبب ... و مش مهم السبب ..

الناس بقت بتتعامل بمبدأ انا ومن بعدى الطوفان
خد كل اللى تقدر عليه من اللى قدامك ... مش مهم اللى قدامك مين
المهم تاخد كل اللى تقدر عليه .. مش مهم اللى قدامك يحصل له ايه
المهم انت ... انت و بس .. حتى لو بتحبه .. بس الحب حاجه و دى حاجه تانيه
مفيش حد بيخلى حد اغلى عنده من مصلحته .. ولا حد ممكن يضحى بحاجه ثانويه عنده
عشان اساسيات حد تانى .... لا انا و راحتى الاول و بعدين اى حد تانى

اهل .. اصحاب ... احباب ... قريبين .. بعاد ...
مبقتش فارقه ... حتى فى وسط ما حد خايف عليك ... هتلاقيه بيفكر فى تاثير حالتك عليه
مش بس تاثير حالتك عليك .... محدش بينسي نفسه

انا بجد مش عارفه
مش عارفه اى حاجه فى اى حاجه
ليه الناس بتتصرف بالوحاشه دى؟؟ ... مع العلم ان الناس كويسه مش وحشين
ليه الحدود راحت .. ليه مبقاش فيه فرق بين كويس و وحش
ليه كله بيتعامل بنفس المبادئ
ليه كل واحد بيفكر فى تاثير كل حاجه على نفسه لوحده بس
حتى انا !!!!

انا مش عايزه الدنيا دى ... و مش عايزه ابقي زيها ... منها و بنتها

ان تــحــب

ان تحب هو ان تتحدى قوانين الجاذبيه الارضيه
تتحدى كل القوانين الارضيه ... تتحدى المنطق ... و تتحدى العقل
ويصبح القلب هو سيد الاعضاء و سيد الكون
سيد كونك ... عالم مختلف .. عالم تانى جواك
عالم حدوده جواك ... و اول ما تعدى الحد ده و تطلع براه
بترجع للقوانين الارضيه و يسيطر تانى العقل

يسرقك عالمك ... و تعيش تحت سيطره القلب
بعدين تفتكر ان فى عالم تانى بره ..
وتفضل انت على الحدود

بس بيفضل السحر .. و الحياه .. و كل حياتك فى عالمك
عالم القلب و المشاعر
عالم بتختفى فيه كل حسابات العقل .. و كل اللى حلمت و خططت له طول حياته
بيبقي مجرد سراب ... و ذكرى
كل معتقداتك ... و الحاجات اللى كنت بتضحك على الناس اللى بيعملوها
بتلاقي نفسك مكانهم
بتلاقى ان كل الشروط و مواصفات الحبيب اللى كنت عايزها ... كل الصفات اللى قلت انك لا يمكن تحب حد الصفات دى فيه
كل ده مجرد خيال ... لانك ببساطه ممكن اللى تحبه يكون فيه كل صفه انت مش عايزها
عقلك ممكن يرفض ... لكن فى عالمك ده .. القلب هو صاحب القرار الاول و الاخير
و تكتشف ان القلب مش بيعترف باى صفات يحددها العقل
و تفضل صفه الحبيب الوحيده ... انك تعيش طول حياتك فى رسم تصورات و قواعد و حاجات اساسيه
و يجى هو يكسر كل ده ... يغير كل القوانين .. يغيرك و يغير عالمك
تلاقى نفسك بتظبط كل حياتك عليه .. على صفاته و مميزاته و عيوبه و كل طباعه

و قلبك اللى هو سيد عالمك ... يفقد فجأه كل سيطرته و قوته
ويعرف معنى الضعف ... و يبقي حبيبه هو نقطه ضعفه و قوته
نقطه ارتكاز كونه كله ... مركز الكون و الحاجه الوحيده اصلا المهمه فى الكون ده

وتحب .. تحب زى ما عمرك كنت تتخيل انك ممكن تحب حد للدرجه دى
وحبيبك يبقي كل حياتك ... مع انك عارف كويس ان مينفعش حد يبقي كل حياتك
بس تانى فى العالم ده كل حاجه بتتمحى
فى العالم ده انت بتحب ... بتعشق ... كل حاجه بتفقد اهميتها الا حبك و حبيبك
حتى نفسك بتفقد اهميتها
بتسامح و تغفر قبل ما تفكر تزعل او تتجرح
عشان جواك حب و مغفره اكبر من اى حاجه مهما كانت
بتفكر فيه حتى فى الجرح .. تفكر ايه موقفه و مبرراته و تعذره و تخاف لا يكون زيك مجروح
تخاف على حبيبك من الدنيا .. من الهوا .. من نفسه ..
تحس انك عايز تاخده فى حضنك و تخبيه جواك من الدنيا كلها
تحميه و تحبه و تساعده ... تكون له كل اللى محتاجه فى الدنيا
تديه كل حاجه .. و تعمل له كل حاجه ..عشان سعادتك انك تعمله كل حاجه بنفسك
تهتم بكل تفاصيله ... تفتكر كل حرف قاله .. تنظم له حياته ..
كل حاجه تخصه تاثر فيك اوى ... فرحه و حزنه ... نجاحه و فشله
يبقي نفسك تشوفه اسعد و انجح حد فى الدنيا .. وتفديه بروحك فى اى لحظه

بس كل ده فى عالمك ... جواك
بس اول ما تخرج براك .. يسيطر تانى العقل
تشوف ان كل ده غلط .. و مشروع فاشل ... تشوف انكم متنفعوش لبعض
تبقي عارف ان المحاوله و الفشل فيهم نهايتك
بس قلبك قطع عليك كل خطوط الرجعه
جوه عالمك مفيش نقاش .. مفيش تفاهم ... عارف كويس ان مينفعش و برده بيحب
بس بره فى قوانين تانيه ... و عقلك هو اللى بيسيطر .. عقلك اه مش بيتحكم فى قلبك
ولا يقدر يمنعه يحب ... بس بيتحكم فى تصرفاتك
و يمنع الحب ده يبان عليك ... و يصد اى محاوله من الحبيب
لك ان تتخيل .. ان حد يحب حد ... و يصده .. يقول لا لنفسه قبل ما يقولها له
ويفضل مصمم و يقول لنفسه لا
بس لا دى للعالم كله ... الا عالمك

Que Sera Sera

Que Sera Sera
whatever will be .. will be

اسهل طريق للراحه ... هو الايمان
الايمان بالله قبل كل شئ و الايمان بالقدر
والايمان ان كل حاجه بتحصل ..وحشه او حلوه هى خير
مش لازم نفهمها فى ساعتها بس هى خير
ممكن تكون تكفير ذنوب ... ممكن تكون بتمنع شر اكبر
ممكن تكون حاجات كتير ... والايمان بالله و بان ربنا مش بيظلم حد
ومفيش حد مش بياخد الـ 24 قيراط بتوعه ..
ولو مخدهمش فى الدنيا هياخدهم فى الاخره ... اللى هى احسن من مليون دنيا

بنحاول و نسعى و نعمل كل اللى نقدر عليه .. ومفيش حد بياخد اكتر او اقل من اللى مقسوم له
ساعه ميلاده و ساعه موته مكتوبين ... و هو بيجتهد فى النص
بيعمل كل اللى عليه و كل اللى يقدر عليه .. و النتيجه فى ايد ربنا
المهم بس انه ميقصرش ... وميندمش على حاجه
يعامل ربنا مش الناس ... مهما اتجرح ميجرحش
مهما اتسرق .. هو ميسرقش .. ومهما اتداس عليه .. هو ميدسش علي حد
عشان لو قال الدنيا كلها وحشه انا لازم ابقي وحش عشان اقدر اعيش
يبقي الدنيا و شيطانه قدروا عليه و خسروه اخرته
لازم يقابل السيئه بالاحسان ... عشان الدنيا متسودش اكتر

هى فعلا الدنيا بقت بتزداد سوء عشان كل واحد قرر ياخد اللى شايفه حقه بايده
انا شايفه ان ده حقى ... هاخده ومش مهم هادوس على ايه او مين فى طريقي
انا ومن بعدى الطوفان .. بس الطوفان خد كل حاجه فى طريقه
خد الخير و النخوه من قلوبنا ... وكتر البكى يعلم القسوه
بقينا اقسى ... حاجات كتير بقت عادى ... بنشوفها و منحسش بحاجه غريبه
السكينه سرقتنا ... واحنا بنحاول نسرق السكينه .. و نقطع فى بعض يمكن نقدر ننقذ نفسنا

اللى فى ايده يسامح حد .. يسامحه
واللى شايف حد غلط فى حقه .. يحاول يحط نفسه مكانه
عشان الظروف دايسه علينا كلنا ... مندوسش احنا كمان على بعض
عشان الدنيا مش مستاهله نشيل من بعض ... الدنيا اصغر و اتفه من كده بكتير
ابدا بنفسك ... ابدا بنفسك و اعمل اللى عايز الناس تعمله معاك

فكر فى بكره ... اشتغل و اعرف ان
success is the best revenge
النجاح هو احسن وسيله انتقام من اى حد جرحك ... احسن انتقام من اى حد حاول يكسرك
اى حد يحاول يقول لك انت فاشل .. انت مش هتحقق اى حاجه فى حياتك
انت متستحقش الا الحياه اللى انت عايشها .. و ده اخرك
عشان اكبر انتصار له انك تصدق كلامه
بس مفيش حاجه فى الدنيا سهله ... و مفيش حاجه مستحيله
ومفيش مبرر للفشل ... الا استسهال الفشل
لان فى ناس بدات من ظروف تحت الصفر و وصلوا للقمه .. مش لانهم معجزات الهيه
بس هما اختاروا صح ...

ناس كتير مستفذهم اعلانات الحزب الوطنى احسبها صح تعيشها صح
هى فعلا مستفذه عشان مش بيطلبوا ده الا من الغلابه و سايبين الاسراف و البذخ بتوع الكبار
لكن الحمله نفسها فكرتها صح اوى
احنا مفيش عندنا اكتر من الاسراف و المنظره .. ناس مش لاقيه تاكل و ناس بترمى اكل عشان عاملين بكميات اكبر من احتياجاتهم
ناس عايشين فى بيوت متهالكه و فوق بيوتهم اطباق دش اكبر من سطح البيت .. عشان يجيبوا اكبر عدد من الاقمار
واحد بيصرف فلوسه على السجاير و المخدرات و سايب ولاده من غير تعليم و بينزلهم الشغل

اكيد انا ضد ان يكون ده المخدر اللى بترميه الحكومه للناس و تقول لهم الحل فى ايدكم و انتوا بس اللى عاملين فى نفسكوا كده .. و الاقتصاد و التوفير هو الحل السحرى لكل مشاكلكم
بس هو فعلا حل من ضمن الحلول ... مينفعش نرفضه لمجرد انه مش الحل الاساسي
حتى لو كان مسكن بيترمى لنا .. ليه نسيبه و احنا محتاجينه
احنا نستفيد به و ننفذه .. و مننساش حقنا اللى مسروق مننا
بس منسرقش احنا كمان نفسنا .. نوظف مواردنا صح و نعيش صح

نحاول منفقدش ايماننا ببكره .. و ايماننا بربنا
الايمان ده اعظم حاجه فى الدنيا ... الايمان هو الامان الوحيد فى دنيا كل يوم بتزيد توحش
هو راحه البال و السعاده ... هو انك تكون متاكد و انت فى اصعب الظروف ان ربنا كاتبلك الخير
هو انك تكون متاكد ان اللى بيحصل لك بيحصل لسبب .. سبب ممكن يكون اكبر من استعابك
بس مفيش حاجه بتحصل عبث .. هو انك تبقي متاكد ان اللقاء نصيب و الفراق مكتوب
ولو مكتوبلك لقا تانى .. هتتقابلوا و لو بعد زمن ... و هتتقابلوا لو بينكم نار و سفر
ولو مكتوبلك فراق ... هتتفارقوا حتى لو كنتوا فى وش بعض
لو مكتوبلك حاجه هتشوفها ... لو حاجه من نصيبك .. لو الدنيا كلها اجتمعت انك متاخدهاش .. برده هتبقي من نصيبك
ولو مش من نصيبك .. لو الدنيا كلها اجتمعت انك تاخدها .. برده مش هتاخدها
و اى موقف بيظهرلك فيه حاجات كتير
بيظهر لك مين يبلعلك الظلط و مستعد يستحملك .. و مين يتمنالك الغلط و من اول غلطه يرفضك
مين بيقف جنبك و مين بيديك ضهره
مين بيقدر يجي على نفسه و يضغط على نفسه و يسندك و مين بيفكر بس فى نفسه
ونفسه قبل اى شيء و اى حد
مين بعيد عنك لكن قريب منك .. ومين قريب و مش شايفك
وتعرف انت مين .. طاقه تحملك .. نقط قوتك و ضعفك .. اللى لازم يتحطوا فى الاختبار عشان تعرفهم

و فى الاخر

God grant me the serenity to accept the things I cannot change;
courage to change the things I can;
and wisdom to know the difference.

كلام على السريع

من باب محاوله انى ادوس و اعمل حاجات جديده
سمعت كلام سلتو و دخلت معاه الراديو
كانت تجربه مزعجه ... لكم الدوشه اللى كانت فى ودانى
جابت لى صداع نصفى ... ده غير انى اتاكدت انى فاشله جدا فى موضوع الاذاعه
لانى مليش فى موضوع الكلام و دور المذيع ده ابزليوتلى
رغم محاولات انغام و سلطان باقناعى انى انفع




اخيرا سمعت خبر حلو
اول قصه حب شفتها فى حياتى
بنت كانت معايا فى المدرسه من اعدادى
كلمتها امبارح ... قالتلى اتخطبت
سالتها .. محمد ... قالتلى ايوه
صفاء و محمد اتخطبوا ... و بيحضروا الشقه و هيتجوزوا السنه الجايه
فرحت جدا بالخبر ده ...
عقبال العايزين


و من تكمله الشجاعه اللى انا بقيت فيها
عملت حركه جريئه و نزلت سقت العربيه .. و قررت اروح بيها الجامعه
طبعا مش لوحدى .. اخويا كان جنبي ... و كل شويه يلحقنى فى اخر لحظه
ويعدل هو العربيه .. بعد ما اكون انا طالعه على الرصيف خلاص
او اكون برمى على الناس ... بس المغامره انتهت فى شارع مجرى العيون
بعربيه جايبه من U turn
وانا كاى واحده شجاعه ... لقيت العربيه فجاه فى وشي جايه عكسي ..
ضربت فرامل ... و سيبت الدركسيون و حطيت ايدى على بقي و انا بصرخ
طبعا نزلت واخويا خد منى العربيه
و هفكر مليون مره قبل ما اسوق تانى .. بسبب شجاعتى الفظيعه


مازالت حالتى الصحيه سيئه
وبعد ما الدكتور زهق .. قرر يبعتنى نفسيه
وانا كنت سعيده بالقرار ده لانى فى اشد الحاجه للعلاج النفسي
ولان اى موقف فيه توتر اعصاب بقى بيتعبنى
عرفت دلوقتى معنى طاسه الخضه :D
اهو دى انا محتاجاها ... مجرد قطه معديه من جنبي
عندها القدره انى اترعش و اعصابى تسيب
سواقه عربيه .. محاوله انتحار ... و اذاعه فى الراديو تخلينى اتعب


ناس كتير اوى فى حياتى
مش كتير اوى كعدد ...بس كتاثير
العدد فى حياتى قليل .. بس اللى بيدخل صعب اوى يخرج
ناس كتير مش قريبين من بعض .. بس عمرى ما احتاجتهم و ملقتهمش
فيهم واحد ... لو قضيت عمرى كله اشكره على حاجات كتير اوى مش هيقضيه
وناس قريبين احتاجتهم و ملقتهمش
ومقدرش استغنى عن الاتنين


عاجبانى اوى الاغنيه اللى حطاها فى البلوج
and the 7th thing i hate the most that you do
you make me love you

فكره عجيبه
بس عايزه اسال كل الناس
ايه الـ 7 حاجات اللى بتكرهوها فيا
بصراحه ... مع وعد منى انى مش هزعل
دى دعوه لن تتكرر للتشريد

ولو انها صعبه
ياريت تدوروا على 7 بتحبوهم كمان (A)
والدعوه عامه

المــنــطــق

ما هو المنطق يا مرسي ؟؟
اشهر افييه فى مسرحيه مدرسه المشاغبين .. يليه افييه مرسي الزناتى اتهزم يا رجاله
بس تفتكروا مرسي اتهزم عشان معرفش المنطق ... ولا لو كان موجود الايام دى و حاول يمنطق الحياه
كان هيتهزم هزيمه اكبر من اللى اتهزمها .. و كان هيقول الحمد لله على نعمه الجهل

اصل صعب اوى تحاول تفهم الدنيا ماشيه ازاى .. او تفهم المنطق اللى ماشيه بيه
حاجات كتيييير اوى ملهاش ادنى علاقه بعم المنطق ده
ولو حاولت طول حياتك انك تمنطقها برده هتفشل
زى المشاعر مثلا ... لا بتعرف انت حبيت ده ليه .. ولا كرهت ده ليه ..
ولا تقدر تتحكم فى مشاعرك ... و تقول لها حبى ده و اكرهى ده ...
ولا برده بتفهم الناس ليه حبتك وليه كرهتك و ليه بتتحول ...
سيبك من ده كله ... حتى لو معرفتش الاسباب ... برده مفيش منطق بيحكم العلاقه
بمعنى انك متقدرش تقول لو فلان حبنى مكانش عمل كذا
ولو علان كان بيكرهنى مكانش عمل كذا
ممكن تعشق حد و تؤذيه ... و ممكن تكرهه و تقف جنبه ...
عشان المشاعر لا تمنطق ...
مكتوب فى كل الكتب برده ان كل الاهل بيحبوا ولادهم ...
بس افتح اى صفحه حوادث فى اى جرنان .. هتلاقى اهالى بيدمروا ولادهم مش بس بيأذوهم
بس الناس بتتصرف بطريقه غريبه ... ممكن تبقي عايز الحاجه
وتتصرف عكس ما انت عايز .. لمجرد عند .. و تنتهى بتدمير حاجات كتير
عشان فى حاجات العقل بيقف قدامها عاجز ... و التصرف بيسبق التفكير
ممكن اتنين يحبوا بعض اوى ... و يتصرفوا مع بعض بمنتهى الغباء ... و يضيعوا بمنتهى الغباء برده كل فرصهم
وكل ما واحد يقرب التانى يبعد

ممكن تبقي عارف انك ماشي فى طريق سد ... تمشي فى طريق عارف ان فيه نهايتك
عارف و شايف و فاهم .. مش مغيب ولا حد ضاحك عليك و مشربك حاجه اصفرا
بس بتمشي و تكمل للاخر ... و انت عارف ان كل خطوه بتمشيها .. كل الطرق اللى وراك بتتقطع
وبيبقي مستحيل الرجوع ... و الطريق قدامك مسدود .. و برده بتاخد خطوات لقدام و بتكمل
وتتعب و تنهار و برده مش قادر تمنع نفسك

ممكن حاجات كتير اوى بس ببساطه لو فكرت تدور على منطق و اسباب مقنعه ليه الناس بتتصرف زى ما بتتصرف
ليه الدنيا بيحصل فيها اللى بيحصل
هتلاقى نفسك فى متاهه ... تايه بتدور على كل الابواب .. بتفكر فى السبب و نقيضه ... بتدور على كل تفسير ممكن
و تشك فى كل اللى تعرفه ... و تكفر بكل البديهيات فى الموضوع و تشك فى كل حاجه
وتتوه اكتر ما انت تايه
يعنى فعلا مرسي لو كان عرف المنطق و حاول يطبقه على الحياه ... كانت اتهزم يا مينززززز اكتر من هزيمته الاولى

دمـــــاغــى

لسه تفكير الناس عنده القدره انه يصدمنى .. و دى صدمه فى حد ذاتها
ماما : خالتك جايبه عريس لهديل
انا : طيب
ماما : ده معيد فى الكونسرفتوار .. مامته صاحبه خالتك .. و قالتلها انها عايزه عروسه بيضا لابنها
فخالتك قالتلها على هديل
انا - فى بلاهه - : نعم ! ..مامته .. خالتى .. عروسه .. بيضا .. بيضا !
ماما : هو ده الجواز اللى بينفع ... مش تقولوا حب و مش عارفه ايه ..
انا - لسه فى حاله صدمه - : بيضا .. بيضا ..
ماما - وهى محسسانى انى غيرانه و ان مشكلتى مع حكايه بيضا عشان انا سمرا و منفسنه و جوايا احقاد دفينه - : ايه المشكله يعنى ؟
انا : انتى بتهرجى .. ده لو واحد كبير و بيخلى مامته تشتري له لبسه .. يبقي حبيب ماما
يقوم يخلى مامته تدورله على عروسه ... و المهم فى الموضوع انها تكون بيضا


______________________________


مش قادره افهم بجد ازاى الناس لسه بتفكر كده .. ازاى حد يقبل يتعامل بالطريقه دى
عايز قميص مخطط ..
انا عندى واحد ..
طب هاجى اعاين .. و بين البايع و الشارى يفتح الله ..
و يباركله يا معلم

____________________________

ماما عندها اقتناع ان دماغى جايه من عالم تانى .. و انى هفشل فى حياتى ..
لانى متخلفه و مش مقدره الاساليب الصحيحه فى الجواز ..
ده غير انها كل ما تفتح الموضوع اصلا بجيبلها احباط و اقول لها افقدى الامل
انا مش عايزه اتجوز .. و مش بفكر فى الموضوع
لانى ببساطه متاكده انى مستحيل اتجوز بالطريقه دى .. او اعيش حياه عاديه
او اكون زى ملايين الناس اللى مربوطين فى ساقيه روتينيه .. ليلهم زى نهارهم
فبجيبلها احباط و اقول لها انا قاعده لك يا حبيبتى


_____________________________

مش عارفه ليه .. عمرى ما اتصدمت فى حد
يعنى ممكن موقف يصدمنى .. لكن عمرى ما حسيت انى اتخدعت فى حد
يمكن لانى ببقي عارفه من الاول .. و ببقي عارفه اللى هيحصل بعدين
الغريب انى بكمل ... بحب اجرب بنفسي ... و مش بندم على حاجه
بالعكس بحسها اهانه ليا لو قلت انى اتخدعت فى حد .. عشان ساعتها العيب فيا انا عشان ساذجه
بس بالعكس .. عمرى ما غيرت رايي فى حد .. دايما احساسي الاول بيطلع صح
ورايي فى اللى قدامى مش بيختلف .. عشان بعرف اقدر اللى قدامى كويس و بعرف قيمته صح

___________________________

مؤمنه ان اغلاط الاخرين لا تبرر اغلاطنا
وان حتى لو غلط غلطه صغيره و اللى قدامك غلط غلط كبييييير
لازم تعتذرله ... عشان انا نفسي مش حد تانى
مش مقتنعه ان حد يمنعنى اكون نفسي عشان احتمال يتفسر تصرفى بطريقه مختلفه
مش قادره اقتنع ان المبادئ بتتجزئ
اللى غلط ... لازم يعتذر .. حتى لو هضيع حق ليا
مينفعش اخد حق حد
مؤمنه بـ
Taking the high road
مش بقدر اكره حد حبيته ... و بسامح فى حاجات كتير
مش المفروض يتسامح فيها ... بس مقدرش اكره و اشيل سواد من حد
بسامح بس مش بنسي
اتقال لى انى كده هبله و ضعيفه ... بس مقتنعه ان دى منتهى القوه


________________________

حاسه انى زى بالونه مليانه ميه ... بس مليانه خروم
كل ما اسد واحد الاقى غيره 10 ....
بقيت لا احتمل بجد ...
انا شخصيا مش متحمله نفسي
محتاجه اجازه من نفسي
بعدها اجازه مع نفسي
و بعدها افكر ارجع للدنيا و الناس ولا لا

عشان محدش له ذنب يتحملنى و انا بالحاله المستفذه دى


نفسي اخد اجازه من دماغى بجد و اشيل الفيشه و ابطل تفكير
عشان مش ينفع اتعب اكتر من كده
ارجوك متبسطهاش اكتر من كده

صدق رسول الله

عن عبد الله بن عمرو بن العاص رضي الله عنهما أن رسول الله صلى الله عليه وسلم قال :
أربع من كن فيه كان منافقا خالصا, ومن كانت فيه خصلة منهن كانت فيه خصلة من النفاق حتى يدعها :
إذا اؤتمن خان, و إذا حدث كذب ,وإذا عاهد غدر , و إذا خاصم فجر "


عــن أبـي هـريـرة رضي الله عــنـه أن رجــلاً قـــال للـنـبي : أوصــني. قال: { لا تغضب } فردد مراراً ، قال: { لا تغضب }. [رواه البخاري]

وحيد فى وسط الزحمه

اكتر مكان بحس فيه بوحده قاتله ... هو فى الزحمه
وانت واقف مع ناس كتير بيتكلموا و يضحكوا ..
بس انت حاسس ان ده مش مكانك
you just don't belong
بتضحك و ممكن تتكلم ... بس انت لوحدك .. مع نفسك
بتفكر .. بتراقب .. بتتفرج على الناس
بيتكلموا مع بعض ازاى .. عينيهم بتقول لبعض ايه ..
بيقولوا اللى لسانهم مش بيقولوا
واحد عينيه بتلمع كل ما يشوف واحده .. كل نظره بتقولها بحبك بجد ..بس لسانه مش بينطق ..
واتنين عينيهم بتقول انهم مش بيطيقوا بعش بس واخدين بعض بالحضن .. و حبيبي و ابن حبيبي
ناس تشوفهم .. تحس انك مستريح نفسيا .. ممكن تكون متعرفهمش كويسو مفيش بينكم كلام .. بس بتحب تشوفهم و تبقي مبسوط قوى لما تتكلم معاهم
و ناس تانيه تشوفها .. عفاؤيت الدنيا كلها تركبك و متبقاش طايق نفسك .. مع ان ممكن برده ميكنش بينكم معرفه
و تحتار انت ...طب انا مين فيهم ؟؟
انا بحب اتفرج على الناس .. بعشق مراقبه النفس لبشريه
يمكن عشان بتعلم و بشوف و بفهم حاجات .. مش ممكن افهمها من حياتى لوحدها
عايزه اعيش مع الناس و اعيش مع نفسي
مش عايزه اتفرج على الدنيا من بره
بحب الناس .. و بحب انهم يحبونى ...
بس برده ببقي وحيد فى وسط الزحمه

رســــالــــة الـــــى مــجــهـــول

مش بعرف اكتب شعر و كلام مزوق ... بس بحبك
من قبل ما اعرف اسمك ... بحبك
من قبل ما اعرف اسمى ... بحبك
من قبل ما اعرف اتكلم .. افهم .. او حتى احب ... و انا بحبك
احساسي بيك اقوى من احساسي بنفسي و الكون
حبك جوه قلبى ... بيكسره و يداويه
بيكسره عشان بيحبك من غير ما يعرفك
و بيداويه عشان حبك هو الحياه لقلبي

اسفه يا حبيبي .. اسفه على كل كلمه بينطقها لسانى لغيرك
اسفه على كل نظره و همسه و ضحكه لغيرك
جنون انك تحس انك بتخون حد لسه متعرفوش
بس قلبي يعرفك ... حتى لو باقي حواسي مشافتكش
بس انت بس اللى من حقه يشوف ضعفى .. رومانسيتى .. انوثتى
لو حد شافهم غيرك .. هحس انى بخونك
وانا مقدرش اخونك ... مقدرش اسمح للنسمه تجرحك .. انا اموت قبل ما انا اجرحك
انت اللى فاهمنى ... عارفنى ... حبيبي انا .. انا و بس
مش مهم تكون الرجل الخارق .. المهم تبقي راجل
الرجل بتاعى انا

انت اللى ممكن تسعدنى و ربنا يعوضنى بيك عن كل لحظه حزن عشتها
نظره من عنيك بالدنيا و اللى فيها .. بحياتى قبلك كلها
بس يا رب ما يبقي فى حياتى بقيه بعدك
معاك بنسي حريتى .. بنسي نفسي

انت قلبى .. ابنى .. حبيبي .. ابويا .. صديقي .. اخويا .. كل دنيتى
الناس ممكن متفهمش .. بس انت فاهم
البنت اما تحب بجد .. حتى لو كانت رئيسه دوله
بتبقي ست امينه ... لسي السيد
مش خوف ... ولا غصب ... بس حب
احنا بنبوس ايدين و رجلين الاطفال و بنخاف عليهم
عشان بنحبهم ... و بنبقي فى منتهى القوه
ضعفي قدامك .. فى حضنك .. منتهى القوه
انا بحط ماسك القوه و التماسك قدام العالم .. عشان انت معايا
فى ضهرى و جنبي و حواليا
انت الامان .. فى عالم مفيهوش امان
انت كل اللى ليا

انا عارفه انى مستهلكش ... عشان انت تستاهل احسن واحده فى الدنيا
بس انا عارفه ان مفيش واحده ممكن تحبك قدى
و بدعي ربنا .. ان حبى لك يعوضك و يكفيك
ولو ان حتى حبى لك .. ميجيش نقطه فى بحر من اللى انت تستاهله
نفسي اديك الدنيا و ما فيها
عشان انت حبك الدنيا و ما فيها ليا

كان نفسي ...
اعرف اقول شعر .. بس كل اشعار الدنيا مش كفايه عليك
كل مزيكا الدنيا مش كفايه عليك .. كل الروايات اللى اتعملت و اللى هتتعمل
متقدرش توصف احساسي بيك
نفسي تأمر .. وانا انفذ ..
بحبك و انت قوى ... و انا ضعيفه و قوتك بتحمينى و محوطانى
و بحبك و انت ضعيف .. بين ايديا .. فى حضنى
قلبى اللى هيتكسر مع كل دمعه منك .. هيقوينى لحد ما تقف على رجلك و تبقي اقوى من الاول
بحبك فى ضعفك اكتر من قوتك .. اذا كان ممكن حبك فى قلبى يزيد
بحبك فى مرضك قبل صحتك
فى فقرك قبل غناك
الناس بيقولوا ان الفقر اذا دخل من الباب الحب يخرج من الشباك
بس هما ميعرفوش حاجه
ميعرفوش انى واثقه فيك واثقه
انك هتقدر تحول الفقر... غنى
عشان انت طموح .. ذكى .. قوى .. و مع حبنا و صبر
هنقدر نحقق كل احلامنا انا استحمل اى حاجه عشانك ... عشان بحبك بجد
اى حب و حنان اى حد شافهم منى او من غيري ... ولا حاجه بالنسبه للى شايلاه ليك

عايزاك مجنون .. و عاقل .. حنين .. و قاسي .. تقتحم الاسوار اللى بنياها حوالين قلبي
اعرفك زى كف يدي و اكتشف فيك حاجه جديده كل يوم
كل يوم تبهرنى .. و احمد ربنا انك من نصيبي
عايزاك مجنون و انا عاقله
عاقل و انا مجنونه
تكملنى و اكملك ... لا الجنون ياخدنا ولا العقل يحبطنا
حنين عليا اكتر من امى
و قاسي ... تنسي حنيتك و تلبس قناع القسوه عشان تحمينى من الغلط زى ابويا

احــســاس

اكتر احساس بيقتلنى .. بكره الضعف .. مش بحب حد يستضعفنى .. يدوس عليا

بتخفى ضعفك جواك .. و تظهر قدام الناس قوي ..

ممكن تعمل الحاجات اللى كانت بتتعمل فيك .. عشان تبين للناس كلها انك مش ضعيف ..

محدش ممكن يدوس عليك .. تبان جامد .. قاسي .. مفترى حتى ..

فى الوقت اللى انت فيه هش .. ضعيف .. و خايف ..

خايف يتداس عليك .. خايف قوى ..

طول الوقت قدام عنيك احساسك و انت قاعد فى ركن بتتفرج على الناس ..

و هما بيضحكوا و انت لوحدك بتعيط ..

و الناس تيجى تدوس عليك و تضحك .. بس المره دى بيضحكوا عليك ..

بيضحكوا على ضعفك و بيدوسوا عليك .. و انت تبكى اكتر .. و هما يضحكوا اكتر ..

لحد ما تقول لا .. مش هبكى تانى .. هقف و اقول انا ميهمنيش حد ..

مش عايز حاجه من حد ... هبنى اسوار حوالين نفسي .. محدش ممكن يعديها و يجرحنى ..

هبان قوى .. هضحك عليهم انا .. هبان قاسي .. بس مش ضعيف ..

اقسى لحظات ممكن تعدى عليك اما قناعك يتهز .. و حد يستضعفك تانى..

حتى لو انت فعلا اضعف منه .. بتحارب و تقاوم .. مش مهم تتأذى اكتر ..

مش مهم تحمى نفسك ... المهم ان محدش يحس بضعفك ..

تقع و تقف .. تاخد ضربه توقعك تانى و برده تقوم..

انت عارف انك مش قده .. بس مش هتستسلم و تحسس اللى قدامك بقوته عليك ..

الموت اهون !!! .. حتى لو هو متأكد .. مش هتديله اعتراف يريحه ..

لا انت الاقوى .. و هتقاوم لاخر نفس .. لانك بتكره الضعف ..

و احساسك بالعجز بيسرق صوتك .. و بيخليك تصرخ من غير صوت ..

بيحبس دموعك فى عنيك .. و تبكى من غير دموع ..

تقف فى وسط ميدان مليان بشر .. تحاول تكلمهم و تشاورلهم ..

تعمل اى حاجه .. بس محدش حاسس بيك .. شايفك .. او سامعك ..

و انت عاجز عن عمل اى حاجه حتى دمعه تريحك ...

خنجر فى وسط قلبك كل ما تحاول تشيله يجرح اكتر و يرشق اكتر

و يتحط معاه 100 غيره .. و انت عاجز ..

اللى على راسه بطحه

مثل سخيف ... بس حقيقي ..

اللى على راسه بطحه بيحسس عليها ..

الغريب بقي انه حتى لو مش عارف ان عنده بطحه ..

برده هيحسس عليها ...

انا مش فاهمانى ... و مش عارفانى برده ..

فيا كميه تناقضات رهيبه ...

و ساعات بعمل تصرفات غبيه و زباله ..

حاجات بنتقضها فى الناس و بتعصبنى منهم ...

و بلاقيها فيا ...

مش عارفه ..

انا مش ملاك ولا بريئه ... بس برده مش كلى زباله ..

يمكن اللى بيشفعلى انى حتى اما بتصرف بطريقه خبيثه او زباله

بيبقي مش قصدى .. مش قاصده اتصرف بخبث و غباء

بس ساعات بنتحط فى مواقف و تتصر و خلاص من غير تفكير

فيا عيب غبى و بكرهه جدا ...

مش بعرف اتكلم مع حد متضايقه منه ...

و الاغبى من كده ان الموضوع بيبقي شاغل كل تفكيرى ..

فمش بتكلم غير عنه ... بس مش مع صاحب الموضوع ..

زى اللى حصل مع الناس الظريفه بتوع الكليه ..

اما اكتشفت انهم بياخدوا درس مع دكتور الماده اللى انا كنت ضايعه فيها

و كنت كل ما اقول لهم هتعملوا فيها ايه .. يردوا بمنتهى البرائه ... هنقراها ..

ساعتها اتجننت مش عشان الماده .. بس عشان اكتشفت ان اللى كنت فاكراهم صحابى

و بقضى معاهم وقت اكتر من اللى بقضيه مع اهلى .. و بنخرج سوا و بيننا عيش و ملح

انى فى الاخر مسواش عندهم حاجه ... و مش فارقه معاهم ..

كان كل اللى يكلمنى .. اكلمه فى الموضوع ده ..

بس عقبال ما شفت الناس دى تانى كنت نسيت و اكتشفت انهم معملوش حاجه غلط !!

هما ماجرموش عشان انا مش فارقه معاهم .. الحب مش بالعافيه ..

فقررت اتعامل معاهم كزمايل عادى ..

بس طبعا كان وصل لهم انى كنت متضايقه .. و بعدين لاقونى بتعامل عادى ..

بقي شكلى منافق .. مع ان الموضوع مش كده ..

انا ببقي حاسه الحاجه فى وقتها و بعملها و اقولها ..

وبعدين خلاص بنسي و مش بحط الموضوع فى دماغى ..

هو طبعا غلط انى اعبر عن اللى حاسه بيه ده مع ناس تانيه غير اصحاب الموضوع

بس مش عارفه .. مش بعرف اتعامل مع حد و انا متضايقه منه ..

غباء ممكن .. بس مش خبث ...

بس حتى فى ده انا بدافع عن نفسي ... و بجمل زباله فيا ..

بس غريب اما تتعامل مع ناس .. حلوه مع الكل ..

ادب و اخلاق .. و ذوق و سكر ..

و يجوا لحد عندك ... طريقه تعامل سخيفه و قله ذوق .. اكنك شخصيه لا تطاق

مش عارفه بيعملوا كده ليه ... نفسي افهم

مش عايزه حد يشوفنى ملاك ... و فى نفس الوقت اكيد مش عايزه حد يشوفنى زباله

انا بشر ... جوايا زباله و جوايا حاجات تانيه كويسه ..

Carma

Carma

What goes around ... Comes around

طول عمرى اسمع عن الـ Carma

لحد ما حصل لى شرف تجربتها ..

وياريتنى ما جربت ...

شيئ سخيف اما تتحط فى نفس الموقف مرتين ..

و المرتين متطابقين و فى منتهى الاختلاف ...

هو هو نفس الموقف بغباءه .. و سخافته ..

بس مع تبديل الاماكن ..

و تعمل مثلث ظريف ... من 3 اضلاع
طبيعى يعنى اى مثلث بيبقي 3 اضلاع ... اى عيل فى kg يعرفها

المهم المثلث الظريف بيبقي متكون من سيادتك ... و الاستاذ س
وتعيش الموقف و يعدى

و للمفاجأه المفرحه .. انك تعيش نفس الموقف تانى
بس انت بقيت س .. و ص خد مكانك

و تلاقيك انت حاسس بنفس احساس س .. و بتقول نفس الكلام و تتصرف بنفس الطريقه ..
فتعذر س ... و تتضايق من نفسك و من طريقتك معاه
و لسخريه القدر زى ما بيقولوا
تلاقى ص بقي انت .. بيفكر زيك .. و يتصرف زيك .. و يعمل نفس ردود فعلك ..
وتعذر ص برده عشان انت عملت زيه بالظبط فى س

و ينتهى بك الامر انك تعذر الاتنين ... و تكره نفسك ...

وتبقي عايز تهرب ... تهرب من س و تهرب من ص
وكل الحروف اللى اخترعوها
تهرب من كل الناس ... مش عايز تعرف حد
مش عايز تكلم حد ...
عايز تبعد عن كل الناس و تعيش مع نفسك ..
فى سلام ... هدوء .. من غير تفكير .. و لا توتر

بعيد عن الـ Carma ...

may be

i need to be angry at you
cause may be ,, just may be this will make me love you less
miss you less
or even make me able to stand your absence

but even if i became angry at you
this would just make me love you more
miss you more
and nothing can make the pain inside my heart go away
or even minimize it

i love you
like no one have ever loved before

the distance between us is killing me
cause even with all this distance
even when i know that there is no hope for us
i love u more each second
i miss u
and i just can't think about anything or anyone else but you

everything i think about leads me back to you
everything is about you
cause you are the most important to me
you are my first priority
you are my only priority

i want to stop loving you
but i can't
loving you hurts so bad


but this is nothing compared to the pain of just the thought of not having you in my life

this is not me

i have changed ,,, all my walls are coming down
i am so vulnerable ,, weak ,, and i don't even care
i only care about you

may be you don't give a damn about me
may be you care about me too

but for sure
you don't care the same way i do

im losing my mind ... my sanity
and i don't care

all this is nothing
it vanishes whenever u r happy
whenever u r sad
whenever u r anything

cause whenever u r happy ... ur happiness lightens my world
and whenever u r sad ... neither i nor my pain matter
the only thing that matter is you

i think im losing myself
and i don't even care

الدماغ فيها ايه ؟؟

هى الدماغ فيها ايه ..
مش عارفه ... هى فيها حاجات كتير و مفيهاش حاجه
فى احلام و اوهام و افكار .. امل و عزيمه و اصرار و يأس و كسل ..
حب و غضب .. و جنون ...

و اسئله
اسئله كتيره ...

هو انا عبيطه ؟؟
ساعات بحس انى عبيطه و ساذجه ...
او حد فاكس ..
وساعات بحس انى حد قاسي ...
ان قلبى مليان قسوه ... بتطلع على ناس من غير ذنب ..

بس انا لا كده و لا كده ...

انا بنت عاديه ... فى منى كتير ..
مش اميره الحفله ... اللى البطل بيحلم بيها ..
و يخلص الفيلم برقصه شاعريه ..
بس برده مش البنت الشريره اللى بتخسر فى اخر الفيلم ..

انا البنت اللى محدش بياخد باله منها .. وممكن حد ياخد باله قبل اخر الفيلم
و ممكن الفيلم يخلص من غير ما حد ياخد باله ..
بس اصلا ميهمنيش الفيلم ..

انا عايزه اعيش حياتى ... بكل ما تحمله كلمه اعيش من معانى ..
عايزه الف و ادور ... و ازور اماكن كتسر و اقابل ناس اكتر
وحشين و حلوين ... لانى هتعلم من الاتنين و افهم حاجات اكتر
عايزه اتعب و افشل و انجح ..
لسه محددتش انا عايزه اعمل ايه ... بس اللى متاكده منه انى عايزه اعمل حاجات كتير
معنديش ادنى استعداد انى ابقي حد روتينى عايش حياه سخيفه
نهارى زى ليلي و امبارح زى انهارده
لا كل يوم .. يوم جديد و حلم جديد .. بس محتاجه اتحرر من حاجات و قيود كتير الاول
بس هانت ... هانت قوى


معلقه معايا اليومين دول اغنيه اليسا
من كتر حبى فيك خلاص انا قربت اكرهك .. عشان مش عارفه اكتر من اللى عملته اعمل ايه

مش عارفه اذا كنت ممكن اوصل للكره
بس بيتهيالى انى هبعد
انا عمرى ما بعدت عن حد .. مهما كان الحد ده عمل ..
عمري ما اخدت قرار انى ابعد عن حد
كنت بستنى اما الطرف التانى ياخد القرار ده ..
مش عشان انا بموت فيهم و هما مش طايقيننى ..
بس مبعرفش اسيب حد محتاجلى .. او مش ضرورى محتاجلى .. مش بعرف اتخلى عن حد و خلاص
مهما كانوا اذونى

بس ممكن اخد القرار ده مع حد بحبه
عشان لما تبقي مش عارف تتصرف مع اللى بتحبهم
كل حاجه بتبقي بتالم قوى
الزعل بيالم ...و الفرح كمان بيالم ...
وانت عاجز .. مش عارف تتصرف ..
مش عارفه هقدر اخد القرار ده ولا لا

بس لو خدته
اعرفوا كويس انى ببعد مش عشان بكرهكوا او مش طايقاكوا
بس عشان بحبكوا زياده عن اللزوم
ومبقتش قادره اتحمل بجد
تعبت قوى

Can't take a Complement !!!

يا سبحان الله
الناس كلها المفروض تتبسط اما حد يشكر فيها
انا بقي لا
زى ما مش بحب حد يشوفنى اقل من ما انا
مش بحب حد برده يشوفنى احسن ما انا شايفه نفسي

انا زى ما انا كده .. حلو قوى ...
هتشوفنى اقل او اكتر ليه ...

يعنى اما حد يتجنن و يفكر يشكر فيا
سواء بجد او هزار ... حقيقي او مجامله ..
بيكره اللحظه اللى فكر فيها يعمل الحركه دى
لانى ساعتها مش زى الناس الطبيعين بقول ميرسي و اهمد و اسكت
لا لازم ادخل فى حوار و نقاش حامى حماسي .. عن مدى صحه و خطا المجامله دى
ويا حظه السيئ اصلا لو كان بيتكلم فى حاجه من My insecurities
:D
لازم نتناقش لحد ما حد فينا يزهق ... و يقول للتانى خلاص براحتك


مش عارف
ماما دايما تقول لى مثل سخيف
نص البلد مش عاجبنى و يا ترى انا اعجب مين

مش عايزه اعجب حد يا ستى
فى ناس بتبقي نازله من غير option الاعجاب اصلا
دى نسخ منتشره فى السوق من زمان
مينفعش باى حال من الاحوال انهم يعجبونى
خصوصا لو حد من الستات اللى يطلق عليهم لقب قراشانات عن جداره
تلاقى الواحده منهم ... فى منتهى الحشريه ...
وعملتى ايه و رحتى فين و جيتى منين ... و ليه معملتيش كده ...
وفجاه بدون مقدمات من غير ما تعرف حاجه عنك
تلاقيها بتفتى فى حياتك ... و بتدى شويه حاجات كده .. المفروض انهم نصايح
بس اللى هو انت المفروض تاخدهم ... على انهم امر مسلم بيه و اوامر لازم تنفذها ..
و انتى عايشه كده ازاى ... و انتقادات سخيفه
و المفروض .. تبتسم و تستقبل الكلام ده ...
و تبقي هتموت وتقولهم ما تروحوا تشوفوا ولادكم بيهببوا ايه الاول
بس لو قلت كده تبقي وغد مش متربى

ولا النوع التانى بتاع الناس اللى عايشه دور البرائه قدام الناس
مش بيعملوا حاجه غلط ... و فى منتهى البرائه
ملايكه مش بيمشوا زينا
لا دول بيطيروا
ومن ورا الناس بتحصل بلاوى ... بس فى السر
واللى يبقي صريح و واضح ... و مش بيعمل نفس الكوارث دى
ولا حتى ربعها
بس مش بيعمل حاجه فى السر ... يبقي فاسق لعين

اه طبعا ميعجبونيش
ولو انا عجبتهم ... يبقي لازم اعيد النظر فى نفسي
لانى ساعتها لازم اتاكد انى غلط

اسكت يا لسانى ... شيئ لطيف انك تبقي لسانك طويل
بس اهو الواحد بيحاول يقلل لماضه و يقصر لسانه
برده اهله ملهمش ذنب .. لانهم مضطرين يتعاملوا مع الناس الغريبه دى

الانــســـان

الانسان كائن غريب جدا

بيعيش حياته يدور على حاجات ... و هى قدام عنيه طول الوقت
بيدخل حياته فى متاهات .. ويعقدها بالتفكير
و من كتر التفكير ... ينسي ايه السبب و ايه النتيجه
ويبقي السبب نتيجه و النتيجه سبب
ويدور فى حلول ... و يفكر و يدور .. و اصلا مفيش مشكله

بيدور على حاجات كتير ... بيدور على حاجات حد يقدمهاله ...
بس المشكله عمرها ما كانت فى الحاجه نفسها ..
المشكله فى اللى بيقدمها ...
هو مين ... و مستعد يقدمها فعلا ... و هل هو عايزه هو ولا لا ...
عشان كده ممكن ... تبقي عايش حياتك كلها نفسك فى حاجه ...
بتحلم بيها .. و هى كل اللى انت بتتمناه من الدنيا ...
وحد يبقي عايز يديهالك ... و يديك كل اللى عنده .. و يديك حياته كملن ...
بس انت مش عايزها منه هو ... واللى انت كنت عايزه و بتحلم بيه..
يبقي حاجه بتخنقك .. و تعصبك ... وتندم انك اتمنيتها فى يوم ...
و تفضل برده محتاجها ...
وتلاقى الحد اللى انت عايزه يديك اللى بتحلم بيه ..
بس الحد ده معندوش استعداد يديك حاجه ..
وتلاقى ان ده ملوش اى اهميه عندك ...
عشان انت مش عايز حاجه خالص ..


و عشان كده ابسط الحاجات فى الدنيا ... زى الاهتمام مثلا ..
بنبقي عايزينه من الناس اللى عايزينهم يهتموا بينا ...
ولو حد غيرهم اهتم ...
او الاهتمام نفسه جه من حد انت مش عايزه ...
الاهتمام ده بيبقى بيتعبك .. مش بيسعدك ...

و الخير بيبقي شر
عشان من المكان الغلط

وعشان كده ... الانسان كائن غريب
بيبقي قدامه كل اللى عايزه و يسيبه بايديه

خليك easy و متبقاش over

انت ممكن تخدع بعض الناس لبعض الوقت

لكن مش ممكن تخدع كل الناس كل الوقت

- حقيقه علميه -

ساعات بتحس ان دماغك فيها مليون فكره فى نفس الوقت
بتفكر فى مليون حاجه ...
ملهمش اى علاقه ببعض ...
ومرتبطين جدا ببعض .. فى نفس الوقت ...
وانت مش فاهم اى حاجه طبعا كالعاده ...

ممكن تتحط اوقات فى مواقف غريبه ...
انك تتحط بين اتنين ...
تعرف عن ده حاجات مينفعش تقولها لده ..
و تقف متكتف و انت شايف ان اللى قدامك بيتخدع ..
بس مينفعش تتكلم و تقول حاجه ... عشان اللى قالها لك قالها و هو واثق فيك
حتى لو هو ميستحقش انك تكون قد الثقه دى ...
بس اصلا انت مش محتاج تقول حاجه و لا تخون الثقه دى ..
عشان مفيش حاجه بتستخبى ... و يا خبر انهارده بفلوس بكره يبقي ببلاش ...
واصلا انت غلطان من الاول عشان يا داخل بين البصله و قشرتها ... و مينوب المخلص ..
الا اخر الامثال الشعبيه كلها ...

طيب سيبك من الموقف ده ...

ايه موقفك من الحدود ؟؟؟؟
مش الحدود الدوليه ... و لا حتى الحدود الداخليه و محافظه حلوان ...
بس حدودك الشخصيه ...
امتى تقول لا .... stop ... مش لاعب ..
مش بحب ابقي حد متزمت ... بحب ابقي انسان open minded
وبحب اتقبل الاخر مهما كان !!! ...
بشوف ان من حق اى حد يكون له اصحاب ... ومن حق اى حد ان يبقي له ناس بتحبه ...
حتى لو كان وحش و فيه عبر الدنيا ...
بس حق انسانى لكل واحد ... ان يلاقى حد يحبه ... يحبه بجد من قلبه ...
ومش معنى ان حد بيعمل حاجه غلط ... انه يبقي كده حد وحش ..
طالما انا حد كبير و واعى و مدرك للى بيحصل حواليه ...
ومش بخلى حد ياثر عليا .. تاثير اكبر من اللى انا اسمح بيه ...
ببقى مش بحب اسمع حكايه متصاحبيش الناس دى عشان بيعملوا كذا !!
مش بكون موافقه على اغلب الحاجات اللى بيعملها اصحابى ... ومستحيل انا اعملها !!
بس ده مش معناه انى اصنفهم من حاجه بيعملوها ...
بالعكس الانسان مليون حاجه ... و صوره كبيره ... مينفعش امسك تفصيله واحده و احكم عليه منها
وطالما التفصيله دى مش بتاذينى فى حاجه ... يبقي مليش دعوه ...
مش معنى كده ان اشوف حد بحبه بيغلط و اسكت ... لا اقول رايي و اقول ده غلط ...
بس مليش دعوه انى اعين نفسي قاضى و احكم على حد ...


المشكله مش فى الرغى ده كله ...
المشكله هو امتى تقول لا ... مينفعش ...
انا بستفيد من كل اللى حواليا و بستفيد من التعامل مع الوحش قبل الحلو
لان لولا الوحش مكنتش هعرف اقدر الحلو
وبفهم و بعرف و باخد خبرات تنفعنى بعدين ...
بس فى حاجات مينفعش فيها المنطق ده ...
you have to draw the line some where


اصلا ايه الحدود بين الخير و الشر
انك تبقي انسان كويس و انك تبقي انسان مش كويس
ايه الحدود بين الطيبه و الهبل و السذاجه
ايه الفرق بين المجامله و النفاق و الاشتغال
ايه الحدود مع الاغراب
ايه الحدود مع الاحباب
ايه الحدود للاحلام .. ايه الحدود للافعال
ايه الحدود للحب .. ايه الحدود للغضب .. ايه الحدود للحدود

اما تعيش حياتك بحدود كتيره قوى ... انت محطتش اغلبها
بس مضطر تعيش من خلالها
انت اه محطتهاش بس بقت جزء منك ... انت هى و هى انت ..
تنزل الدنيا ... مفيش حاجه فيها اسمها 1+1=2
مفيش مساله ومعطيات بتطبق القانون و توصل لحل فى الاخر
لازم تبقي flexible مش rigid تبقي لين مش ناشف
كل موقف له قانونه ... كل حاله ... حاله خاصه ...
و تتوه فى وسط حاجات كتير ...
هو انا old fashion ولا انا open minded



خليك easy و متبقاش over

خليك easy و متفكرش .. و ان فكرت .. متفهمش ...
و ان فهمت.. متصدقش ... و ان صدقت ... متحسش ...
و ان حسيت... متتجرحش... و ان انجرحت.. متبينش ..

عشان لو بينت مش هتبقي easy

متفكرش ايه بيحصل ليه ...
متفكرش هى ليه تبقي بتضحك لك ...
وفجاه تديلك بالجزمه ...
متفكرش فجأه ليه كل الناس اللى عرفتهم فى حياتك
عاملوك بنفس الطريقه ...
مع انهم ميعرفوش بعض ...
ومختلفين جدا عن بعض
مفيش مشترك بينهم الا انت ...
متفكرش وانت بقيت بتكره مشاعرك ...
عشان بتخليك ضعيف ...
مشاعرك بتحول كميات الغضب اللى جواك لحب و حنان فى لحظه و بكلمه ...
مشاعرك تخليك تتقبل حاجات عمرك فى حياتك ما كنت تتخيل انك ممكن تتقبلها ..
وتقول لا خلاص ... انا جبت اخري بجد ... و كل حاجه ولها حد زى MTM
وفى لحظه تنسي كل القرارات وكل الكلام ...

متفكرش انت ليه مش قادر تنسي ... او تسامح ...
مع انك بتنسي و تسمح على حاجات تانيه كتير ...
بس اللى مش ممكن اقدر انساه ... ان حد قريب منى يشوفنى واقعه على الارض
واقعه تحت الارض ... و يبص ببرود و يمشى ...
انا اصلا مش عايزه حاجه من حد ... انا قادره اقف لوحدى ..
بس ليه ..... ليه كده ...
اى حب و حنان جوايا بيتحولوا لجمود و برود ... لما حد بيعمل معايا كده ...
عشان مش بقدر استوعب كميه القسوه او الكره اللى تبقي جوه حد ..
عشان يشوف حد فى حاله زى دى و يودى وشه الناحيه التانيه...
ده لو حد غريب فى الشارع ... هيقف يساله مالك ؟؟؟

الدنــيــــا ايــــه ؟؟

الدنيا زى عربيه ... اى سياره .. او اتوموبيل زى الافلام القديمه

المهم ان العربيه دى ... انت الاول بتتولد

وتركبها ... طبعا انت بتتولد حته بتاعه كده متفهمش حاجه فى البتنجان

فمش مش هتتولد تسوق العربيه على طول

لا الاول بتركب العربيه و يتساق بيك

وانت تكبر و تفهم و تتعلم و تعدى بيك السنين

وانت لسه راكب و بيتساق بيك ...
مش بيبقي من حقك اصلا تقول انت هتروح فين او تيجى منين
انت مجرد راكب يا كلب ...
اما تبقي تتعلم تسوق و يبقي عندك عربيتك ابقي سوق انت ..
طبعا تحاول تقنع فمين انك انت مش عايز تمشي فى الطريق ده
بس مش بمزاجك يعنى ... كلم نفسك براحتك ..
واللى عايزينه هيمشي ...
وانت و حظك بقي ...
اتحطيت فى عربيه اللى فيها بيعرفوا يسوقوا ..
ويستحقوا يبقي معاهم رخصه ..
ولا مش بيعرفوا و هيلبسوك فى الحيط ...
هيطلعوك على طريق صح ..
ولا هيتوهوك ..
هيصلحوا طريقك ولا هيبوظوه و يبوظوك انت شخصيا
وتبقي محتاج عمره زى العربيه
كل واحد و نصيبه و اللى مكتوب على الجبين لازم تشوفوا العين
اه و النعمه يا اختشي

المهم ان ربنا يكرمك و تسيب العربيه الغريبه دى
و تكبر كده و تبقي شاب زى الفل
رخصته فى ايده ..
وتدور على عربيه ولا حتى توك توك تسوقه
المهم انك انت اللى هتسوق و انت اللى تختار طريقك
وبرده انت وحظك ..
ممكن متلاقيش لا عربيه ولا توك توك ولا حتى سكوتر

بس ساعتها مينفعش تياس و ترجع للعربيه الاولانيه
و تقول اللى نعرفه احسن من اللى منعرفوش
وهو انا كنت لقيت حاجه و قلت ولا ...
مش مهم تلاقى حاجه تسوقها ....
شوف انت عايز تروح فين ...
واتشعبط فى اى اتوبيس ...
او حنطور ... بس اوعى حد سخيف يشوفك و يقول للسواق كرباج ورا يا اسطى ..
المهم انك توصل للمكان اللى انت عايزه ...
اللى انت اختارته ... مش مهم وصلت ازاى ..
وطبعا مش وصلت هناك .. يبقي خلاص خلصت الحكايه و تقعد ..
ساعتها ممكن تلاقي التوك توك بتاعك ...

و تسوق انت ...
تختار طريقك اللى هتمشي فيه ...
بس الطريق ده انت مش بتمشي فيه لوحدك ...
و مش هتقول خلاص الدنيا بقت بمبى على راى الست سعاد ..
لا معاك ناس كتير سايقين فيه ...
فيهم كتير مش بيعرفوا يسوقوا ولا بيعرفوا يعملوا اى حاجه اصلا
وهتلاقيهم بيزنقوا عليك ... و يكسروا فجاه عليك ..
و بيعملوا اى حاجه عشان تلبس فى الحيط .,. او تطلع على الرصيف و تركن على جنب
اى حاجه ... المهم انك كتكملش طريقك
بس انت و شطارتك بقي و حرفنتك فى السواقه ..
هتعرف تاخد غرز و تهرب منهم ...
ولا هتتزنق و تقع ومتعرفش توصل

and that is the question

اللى هو هو بتاع الرفيقه الدادا ام عطيات
لا قصدى السؤال بتاع الرفيق هاملت