Sunday, July 5, 2009

هو و هى

هى متعصبه و مش طايقه نفسها
هو جاى يكلمها
هى: بتتعصب عليه و تزعق و تقوله سيبنى دلوقتى
هو: بيتعصب منها

هى: الضغط بيوصلها للانهيار
هو : هيتجنن عليها

هو
: انا اسف جدا بس مش عارف على ايه ..لو كنتى زعلانه منى ارجوكى سامحينى
لو حد غيرك والله ما كنت سيبته .. لكن عشان انتى .. انا كده سكت .. انا مش عارف اعمل لك ايه .. والله انا فعلا حاسس بيكي ... وحزين جدا عليكى .. انا كنت والله هسقط انهارده فى الامتحان رغم انى مذاكر كويس .. فى كل سؤال كنت بشوفك وانتى بتعيطى والله ...

هى : انا مش زعلانه منك .. انا بس زعلانه .. بجد زعلانه
حصل خير


هو: عامله ايه دلوقتى .. انا مكنتش اعرف انك غاليه عندى كده
انا حاسس ان انا اللى زعلان والله
كفايه كده بقى
طول ما انا معاكى ميهمكيش اى كائن بجد

هى : مردتش

**************

الفيلم ده بدأ ينرفزنى انا .. و شكله هيبقي من انواع الافلام اللى بتبقى عايز تدخل تدى الابطال قلمين

هى ليه قاسيه كده
الدنيا كلها شايفه و حاسه انه هيتجنن عليها
وهى مش مدياله اى وش

حد لاقى اصلا حد يحبه كده؟

9 comments:

Yasmine said...

انتى ليه حكمتى عليها انها قاسية يا نانسي مش يمكن مقدرة احساسه ناحيتها بس مش حاسة بحاجة ناحيته؟..

ساعات كتير الناس بتشوف اللى هى عايزة تشوفه و كل واحد يبدا يحط تخيلات من عنده و توقعات و احكام للى هو شايفه..و مش بعيد يبتدى ينصح و يوجه و يقولك انه عارف المصلحة و الصح فين و لما تبصى على حياة الناس دى هتلاقيها محتاجة عمرة عشان تبتدى بس تتصلح

.. ماحدش بيبقى عارف ايه اللى بيحصل غير اللى جوا القصة نفسها..الناس بتودى فى داهية لكن الاحساس عمره ما بيخيب

و لأ طبعا ماحدش بيلاقى بسهولة حد يحبه كدا..و يمكن ما يلاقيهوش عمره تانى..لكن فى رايي مش كفاية ان طرف واحد يبقى بيحب بالجنان دا..لو ما كانوش الاتنين مجانين ببعض بنفس القدر الحكاية بتبقى مملة اوى

مش عارفة بعدت عن الموضوع ولا لا بس اصلى اعرف واحدة عايشة فى قصة شبه اللى بتحكى عنها فقلت اقول الكلمتين اللى فى نفسي هنا بدل ما انا مش عارفة اقولهم فى حتة تانية :)

Romaya said...

الفقري فقري طول عمره يا حبيبتي :D

بصي اهو احنا بنات مع بعض بس حابه اقولك ..
بصراحة في بنات بتبقى شامه نفسها شوية ولما بتلاقي زيادة اهتمام من الشاب وإنه غرقان في حبها ومستعد يعمل اي حاجه عشانها ومجنون بيها,, حضرتها بقى بتاخدها الجلالة حبتين وبتتخيل انها السفيرة عزيزة وعلقلها عمال يهاتي جواها ويقول "دا ماله دا ؟ ..مش نقصاك انت كمان"

وصدقيني دي لو سابها يومين هي اللي هتسأل عليه!

شوفي العلاقة اللي زي دي الولد فعلا حاببها وبيموت فيها
بس البنت مش قاسية ممكن جدآ يكون الولد مش في بالها اصلا عشان كدا رد فعلها بيبقى بالطريقه دي عليه

Romaya said...

سوري يا نانسي جاية اقولك شايفه نفسها كتبت شامة:D:D

عايزة انام والله:D

Nanoz said...

المشكله يا فله انها قلبها بيوجعها مع كل كلمه بيقولها .. و مع كل نظره قلق و خوف منه..
من غير ما يحس هو بيقتلها بحبه .. اللى مش متبادل .. هى حتى معندهاش الرغبه انهم حتى يكونوا اصحاب

هو بالنسبه لها شخص عادى

انتى بتتفرجى و مش بتتدخلى بس زى اللى بيتفرج على ماتش كوره من ورا التلفزيون .. و قاعد يرسم خطط ولا اجدع جهاز فنى ... هو مش هيروح ينفذها فعلا .. بس اهو بيشارك معنويا :D


ده البلوج منور على فكره .. انتى قولى كل اللى عايزاه وقت ما انتى عايزه .. و لو فى حاجه تانيه مش عارفه تقوليها فين
تعالى قوليها هنا برده ... هتلاقينى انا كمان بقولها تقريبا :D

Nanoz said...

خالص يا مروة
هى يمكن رد فعلها كده .. عشان من جواها رافضه حبه ده .. و عايزاه يبطل يحبها
عشان مفيش امل من حبه ده
فبتقسى عليه ..

هى خايفه عليه فى الحقيقه

بس الغباء فى انها مش حاسه ناحيته حاجه

القسوه فى انها ازاى مبتحسش لدرجه انها متحسهوش و هو هيتجنن كده

Fatma said...

والله لو كل بنت بادلت اللي بيحبها نفس الشعور يبقى كل واحدة هتحب 5 على الاقل
دا تهريج
مش ذنبها انه بيحبها هو عايزيحبها يحبها براحته هي مالها مادام لا وعدته بحاجة ولا عشمته بحاجة انما لو هي بتستهبل تبقى عايزة تتضرب بالقلم زي مانتي بتقولي

انما لو ماعملتش حاجة وهو بيحبها وهي مش حاسة ناحيته بحاجة يبقى طبيعي انه يبقى بيضغط على اعصابها باهتمامه دا فعلا ضغط وطبيعي انها تعامله بقسوة يمكن يطفش وتترتاح من تعذيب النفس اللي بيسببه ليها حبه

هي مش قاسية هي بس محتاسة والافضل انها تكون اوضح من كدا عشان تخلص وترتاح وتريحه

Here i'm said...

quote the founoon's comment :)

Nanoz said...

فنفون : هى يا حرام لا عشمته ولا قالت حاجه ... و المشكله كمان ان هو ساكت ومقالش حاجه .. فمعرفتش تنهى الحكايه نهائى

بتحاول تبقى واضحه و تلمح ان الموضوع مش فى دماغها نهائى . ومفيش فايده

هى ممكن يكون فعلا مش ذنبها
بس الموقف كله على بعضه هو اللى سخيف
واما طرف بيصعب عليكي ... غصب عنك بتيجي على التانى حتى لو مظلوم

Nanoz said...

كبارى:
quote my reply to founoon's comment :):P