Wednesday, May 20, 2009

...

هو : انا معجب بيكي اوى

هى : ميرسي

هو : لا بجد ... انا فعلا معجب بيكى اوى من اول ما شفتك

هى : ميرسي بجد

هو : انا حتى على طول عيني مش بتتشال من عليكي
كل ما ابص الناحيه التانيه الاقينى رجعت ابصلك تانى

هى : ميرسي ربنا يخليك







هو : ايه ده ؟؟!! انتى لسه تعبانه

هى : اه شويه .. بس انا متعوده على كده

هو : متعوده على ايه ؟! ... كده غلط
البس و اجى اوديكي للدكتور

هى : ميرسي ربنا يخليك .. الموضوع بجد مش مستاهل
انا الدور ده بيجي لى كتير .. بياخد وقته و باخد الادويه و بيروح

هو : لا بس انتى تعبانه اوى .. طب اجى اجيبلك ادويه

هى : ميرسي بجد والله .. انا خدت كل الادويه خلاص

هو : الف سلامه عليكي
ان شاء الله انا و انتى لا

هى : بعد الشر متقولش كده

هو : لا بس اشربي حاجات سخنه و اتغطى كويس

هى : ان شاء الله

هو : لا انا مش بهزر ..

هى : حاضر ان شاء الله

هو : خلى بالك من نفسك كويس عشان انتى غاليه اوى عليا
انتى تقريبا من اغلى الناس اللى قابلتهم فى حياتى

هى : ميرسي ربنا يخليك .. انت كمان خلى بالك من نفسك و ذاكر كويس

هو : المهم انتى اشربي اللى قلتلك عليه و خدى الدوا و انا هتصل بيكي بعد نص ساعه اطمن عليكي

هى : حاضر ان شاء الله


و تقول له سلام ... و تقفل الموبايل خالص


الفقرى فقرى طول عمره
توب علينا يا رب

16 comments:

Here i'm said...

بصى .. أول حاجة الأغنية دى انا بموت فيها ..

بس حاولى تسمعيها بصوت Bill Withers اللى مغنيها فى فيلم notting hill

بصى .. فكرة ان حد معجب بحد و يصارحه كده .. مش بتعجبنى .. مش بتعجبنى علشان لو النهاية بقت كده بالنسبالى مش حتبقى ظريفة

علشان كده الواحد بيعدى عليه ناس و هوا فى مكانه .. بتعدى ناس مهمة و بتتاخد من قدام الواحد عينى عينك .. ولا كأن حاجة حصلت

بس هوا صريح ليه كده زيادة عن اللزوم :D

ســـــاره said...

هو مين دول يا ننوسة :D
ابقي قوليلي بعدين بيني وبينك :D

في ناس بتحاول تعبر عن اعجابها بس بتخونها الطريقة نفسها .. جميل لما تحسي بإهتمام حد بيكي بس الأجمل ان الطريقة دي تكون محببة مش منفرة وتحسي انه لازقلك في كل حاجه!!

انا بقالي شهر كاتبه حوار (هو وهي) ومش عارفه حنزله امتى ان شاء الله الأسبوع الجاي يشوف النور :D

Nanoz said...

كبارى :
الاول انت منور البلوج :D

الاغنيه دى انا بعشقها ... و عاملاها ringtone
على الموبايل عندى بصوت Bill Withers
بس اما جيت اجيبها على البلوج بتاعته علقت :D
فلقيت قدامى كريس بتاع american idol
فقلت احسن من مفيش خالص


صدقنى المشكله مش فى الصراحه .. المشكله اما حد تعرفه من اسبوعين بس .. و فجاه كل كلامك معاه يبقي بالطريقه دى .. و قدام الناس كمان ... بيبقي منتهى الاحراج ... و الناس اصلا بالرخامه الكافيه انهم اول ما يصدقوا


فممكن لو حد اعجب بحد يروح يقول له ... بس مش قدام الناس كده

Nanoz said...

ساره حبيبي

هقولك اما اشوفك و النت يحترم نفسه و يوصل الكلام بجد :D

بقالك شهر كاتباه و لسه هتنزليه الاسبوع الجاى
انت كده بتهزر يا حاج

انا مليش دعوه .. انا عايزه ادخل الاقيه على طول .. مش بهزر انا (H)

Fatma said...

ههههههههههههههههههههههههههه

موتيني من الضحك

فقرية فقرية يعني

مادوموازيل ان شالله ميرسي دي رهيبة

عموما النسخة دي من الرجالة كترت اوي
انا بعتبرها نوع من الاسطوانات المشروخة
زي بردو لو الموقف معكوس
بتلاقي لستة محددة دايما البنت بتقولها
بلاش سجاير صحتك
ما تتأخرش برا اوي كدا انا بقلق عليك
الادان ادن يالا قوم صلي

اووووووووف

ما بفهمش انا حد يعمل نفسه مهتم اوي كدا عشان يوصل احساس الاعجاب
اصل اكيد ما حبيناش بعض من اول نص ساعة يعني

ستيريوتايب غريب

وحشتيني يا نونزي

Romaya said...

يووووووووووووه على دا كلام بيتقال..

تحسي وانتي بتسمعي الكلام دا كأنه بيتحاكالك حدوته قبل النوم وعلى وشك ابتسامه سخيفه ومفيش ثواني والنوم بيلاعب عيون حبيبيي:D

العلاقات اللي من النوع دا بيتبقى حاجه كدا زي واحد شاف واحدة اعجب بيها طب خلاص نقول الكلمتين الحلوين بقى لعل ننول الرضا .. وهو لا حب ولا نيله!
ومعظمها ويمكن كلها بتخلص زي مانتي نهاتيها كدا في البوست

:Dتقوليش ياختي تسالي وازازة لب

Romaya said...

اه صحيح نسيت اقولك يا نانسي
عاجبني اووووي بوستك قبل الاخير (تعبت من اللقا)

ولا اول جمله (اه تعبت من اللقا عشان قتلني الفراق)

ايه يا بنتي الاحاسيس دي كلها ارحميييييييييييني:)

Nanoz said...

فنفون :D

ما هو اصل هى هتقول ايه :D
كل حاجه باذن الله ...
بس سخيفه سخيفه يعنى .. مش اى كلام :D

ستريوتايب مريب وانتى الصادقه :D

المشكله بالنسبه لى اما بتفرج على المواقف دى .. هى ان لما حد يستخدم حاجات حقيقيه فى اسطوانات بحس انها بتبقي ماسخه

يعنى السطوانات و الكلام ده و الخوف و الحاجات دى كلها .. بتبقي تحفه و محصلتش بس لو كانت حقيقيه و كانت من الحد الصح

لا يكون حد بيافور و بيستخدم اسطوانات ... ولا حد انتى مش عايزه اهتمامه .. واهتمامه يخنقك

كل حاجه فى مكانها حلو

انتى كمان وحشانى يا فنفون و فله كمان

Nanoz said...

مروه هانم بذات نفسها منورانى هنا

ايه الهنا اللى انا فيه ده يا ناس

تسالى و لب و سودانى ... و الحق قول الكلمتين اللى حافظهم قبل ما تنساهم .. عشان تقلب المواضيع بدرى بدرى


بس منكرش انى مستمتعه كشخصيه شريره زيي كده .. بالفرجه على الفيلم ده :D:D

يا حبيبي البوست و صاحبته نجيبهم لحد عندك .. يا سلاام يعنى .. احنا عندنا كام مروه نكتبلها مواضيع بجرهخ احاسيس زياده مخصوص :D:D

وحشانى يا بت :D

Yasmine said...

بصى يا بنتى اللى كنت عايزة اقوله انتى قلتيه فى رد من ردودك..المهم يبقى صادق و مش مفتعل..الحركات مفيش اسهل منها لكن ان نفس الحركات تطلع من شخص صادق بجد و حاسس بكل كلمة بيقولها و بكل حاجة بيعملها دا اللى فى منتهى الصعوبة..
ما دام كان صادق فى احساسه بجد تتقال بوضوح ولا بنظرات و معاملة مختلفة مش هتفرق كتير

محظوظة بجد اللى تلاقى حد يعمل معاها كدا عشان هو حاسس انها تستاهل تتعامل كدا مش عشان مزنوق فى خروجة فى الويك اند ولا صيفية ظريفة فى مارينا..

بس ميرسى دى فكرتنى بواحدة اعرفها لقت واحدة ست فى سن مامتها بتوقفها فى الشارع عشان تقنعها تتجوز ابنها اللى هو قبطان بحرى زى القمر و عنده 25 سنة..هى برضه طلع عليها بميرسى ربنا يخليكى كانها بتعزم عليها بعلبة عصير :D

Nanoz said...

محظوظ بجد اللى يقابل احساس حقيقي فى دنيته ... من كتر الاحساسيس المزيفه .. الاحساس اللى بجد بقى نادر و ساعات صعب تتعرف عليه حتى لو كان قدام عنيك ... من كتر التمثيل المتقن اللى بقى موجود


:D ايون ... هى علبه العصير بالظبط
اكنه كان بيقولها تاخدى شكولاته .. و هى ميرسي ربنا يخليك الف شكر :D

مش ده الرد فعل اللى مستنيه خالص


لسه كنت بقول لفنفون انكوا واحشينى اوى

Anonymous said...

كنت هقولك,يمكن شاري:)

بس,الردود قالت لي,لأ :)


بس برضه

يمكن شاري:)

مين عارف غير ربنا,الله أعلم:)

يمكن شاري:) يمكن:)


الله أعلم

بس


امم


معرفش

Anonymous said...

هو الإنسان في الدنيا

لو


مش عارفة:)

مفيش:)

..

هقولكم آه :)


مش عارفة مفيش أي حاجة:)

Anonymous said...

يعني

بصي,بصراحة

لو إحنا,بنسأل يوم

على حد

!ممكن,يعتبرها كدة,أو يفكر كدة؟


!الأفضل منسألش؟

!!؟



ممكن بدون قصد

تتاخد,من الناس,إللي بنعرفها


!كدة فعلا؟



مش عارفة,بجد مش عارفة

وقاعدة أحاسب نفسي بجد

عن سؤالي عن ناس


وخايفة قوي

من تصوراتهم بجد

مش مشكلة

طنشي بقى :)


..........



يارب تكوني بخير,وبصحة كويسة بإذن الله :)


إنتي,ومارو,ونورهان:)

Anonymous said...

علشان من كتير,مش كلمتك وشفتك,إنتي ومارو ونورهان سراج:)

المهم

يارب تكونوا بألف خير,ومعلهش عن التقصير,ويارب بألف خير:)

Nanoz said...

ايمان : نفسي بجد افهم منك حاجه
مش قادره افهم يعنى ايه .. بس .. ممم .. مش عارفه ... يمكن .. و بعدين طنشوا طنشوا

قولى رايك على طول ... و لو مش عايزه تقوليه .. متبعتيش الكومنت و امسحى الكلام
بس متكتبيش رد يا حبيبي و تقولى طنشوه
اى حاجه تقوليها او تفكرى فيها ... مينفعش نطنشها .. ده رايك و لازم تدافعى عنه و تقوليه و ش مهم اى حاجه تانيه

لو مش مقتنعه بيه ... متقوليهوش من الاول .. بس مش تقولى و تقللى منه

والموضوع على فكره ملوش دعوه بالسؤال على الناس
ممكن حد يسال عادى و ممكن حد يتسهوك و يسبل .... الاول اهلا و سهلا .... التالنى هو اللى فيه المشكله

متتعبيش نفسك و تحمليها فوق طاقتها بالتفكير فى حاجات بعيده عنك