The Cherry On Top Of My MilkShake

يوم فى منتهى الروعه ...
فى اتفاق غريب بين الناس على حرق دمى و اعصابى
مع ان كلهم ميعرفوش بعض
بس هو تقريبا فراغ ... كل واحد يلاقى نفسه فاضى
يقول ليه منحرقش دمها شويه


من اول ما اليوم بدأ و انا مش طايقه نفسي
تعب و ارهاق و عدم نوم .. و قرف من المشاريع وعك الفريق

اى هبل بيتقال عليه شغل جامد و محصلش
اللى بيشتغل بيتساوى عادى جدا باللى مش بيشتغل
مفيش اى فرق ... كله محصل بعضه

ممكن اروح اجيب كلمتين الزقهم جنب بعض ... و اجى اقول انا عملت شغل رهيب
استحق عليه نيشان و تعظيم سلام
كل واحد مش فالح الا فى الكلام بس .. و ساعه الشغل مفيش
ابيض

بس زى الفل ... وماله !!!




انا مش طايقه نفسي بجد خلاص


بجد ... والله العظيم ... لا فعلا يعنى
هو حقيقي الكلام ده
مش عارفه اقول ايه ؟؟
بس بيقولوا الاسم لطوبه و الفعل لامشير
وانا بسمع الكلام ... و اجى اشوف الفعل ... مش بلاقى اى علاقه
يمكن العيب من عندى
جايز برده



هو ايه الصح ... و ايه الغلط ؟!

مش عارفه
ولا عايزه اعرف

اللى عارفاه انى مخنوقه من الدنيا كلها و من نفسي

مش مستحمله حاجه

...

هو : انا معجب بيكي اوى

هى : ميرسي

هو : لا بجد ... انا فعلا معجب بيكى اوى من اول ما شفتك

هى : ميرسي بجد

هو : انا حتى على طول عيني مش بتتشال من عليكي
كل ما ابص الناحيه التانيه الاقينى رجعت ابصلك تانى

هى : ميرسي ربنا يخليك







هو : ايه ده ؟؟!! انتى لسه تعبانه

هى : اه شويه .. بس انا متعوده على كده

هو : متعوده على ايه ؟! ... كده غلط
البس و اجى اوديكي للدكتور

هى : ميرسي ربنا يخليك .. الموضوع بجد مش مستاهل
انا الدور ده بيجي لى كتير .. بياخد وقته و باخد الادويه و بيروح

هو : لا بس انتى تعبانه اوى .. طب اجى اجيبلك ادويه

هى : ميرسي بجد والله .. انا خدت كل الادويه خلاص

هو : الف سلامه عليكي
ان شاء الله انا و انتى لا

هى : بعد الشر متقولش كده

هو : لا بس اشربي حاجات سخنه و اتغطى كويس

هى : ان شاء الله

هو : لا انا مش بهزر ..

هى : حاضر ان شاء الله

هو : خلى بالك من نفسك كويس عشان انتى غاليه اوى عليا
انتى تقريبا من اغلى الناس اللى قابلتهم فى حياتى

هى : ميرسي ربنا يخليك .. انت كمان خلى بالك من نفسك و ذاكر كويس

هو : المهم انتى اشربي اللى قلتلك عليه و خدى الدوا و انا هتصل بيكي بعد نص ساعه اطمن عليكي

هى : حاضر ان شاء الله


و تقول له سلام ... و تقفل الموبايل خالص


الفقرى فقرى طول عمره
توب علينا يا رب